VIKEKE, 21 Agostu 2025 (TATOLI)—Xefe Suku Bahatata, Postu administrativu Uatukarbau, Munisípiu Vikeke, Patrício Maria Pinto informa projetu reabilitasaun estrada rurál área Ulukaibei liga bá Kaiualita, Suku Bahatata empreza responsavel hahú implementa obra.
“Projetu reabilitasaun estrada rurál ba ami-nian agora daudaun empreza responsavel hahú halo servisu konstrusaun. Ami sempre akompaña servisu. Kada loron empreza halo distribuisaun materiál hanesan fatuk, rai-henek no materiál sira seluk bá fatin konstrusaun,” Patrício ba TATOLI iha Postu Uatukarbau, Kinta ne’e.
Autoridade ne’e observa katak projetu reabilitasaun estrada Ulukaibei-Kaiualita daudaun ne’e servisu la’o di’ak no autoridade Suku Afaloikai no Bahatata kontinua akompaña servisu.
“Ha’u sente obra reabilitasaun estrada rurál bainhira konkluidu bele fasilita movimentu transporte sira-ne’ebé asesu mai iha ami-nia suku. Tanba durante ne’e ami-nia kondisaun estrada difikulta komunidade hodi lori sai sira-nia produtu lokál ba merkadu,” nia informa.
Enkuantu, projetu reabilitasaun estrada ne’ebé implementa iha Postu Uatukarbau mak hanesan estrada rurál Ulukaibei-Kaiualita ho nia STA 3+500-7+000 husi Suku Afaloikai ba Suku Bahatata.
Projetu reabilitasaun estrada rurál husi Ministériu Obra Públika (MOP) ne’e responsabiliza husi kontratór Sabirara Unipessoal, Lda ho ninia númeru kontratu MPW-W-04126, ho montante kontratu $730.536,11, progresu atuál atinje 5%.
Aleinde ne’e, iha mós obra reabilitasaun estrada rurál Uaidasu-Nabo hamutuk kilómetru 3 responsabiliza husi kompañia Rizonel Unipessoal, Lda ho nia númeru kontratu MPW-W-240121, ho montante kontratu US$580.744,60. Projetu ne’e lokalizadu iha Suku Luiulu, Iraben de Cima, Bahatata, Postu Administrativu Uatukarabau. Obra referida sei finalizadu iha 13 Novembru 2025.
Jornalista: Vitorino Lopez da Costa
Editór: Xisto Freitas da Piedade
