DILI, 21 Agostu 2025 (TATOLI)-Diretór Diresaun Servisu Investigasaun Kriminál Nasionál, Superintendente Polísia João Belo dos Reis, hateten Diresaun Servisu Investigasaun hamutuk ho Komandu Polísia Munisípiu Kovalima hahú investiga kazu sidadaun Indonézia-ida ne’ebé mate iha área fronteira Fatumea, munisípiu Kovalima.
“Ekipa agora daudaun halo hela servisu hodi identifika fatin ne’ebé potensia ba risku krime, ne’ebé ita-nia ekipa sira iha kraik hala’o hela servisu hodi identifika problema ne’e”, Superintendente Polísia João Belo hatete ba jornalista sira iha edifísiu Ministériu Interiór Vila-Verde, kinta–ne’e.
Kazu ne’ebé akontese foin lalais ne’e iha loron Domingu, (17/8), parte seguransa seidauk bele atualiza ba públiku tanba sei iha hela prosesu investigasaun.
Nia hatutan, Komandu Polísia Nasional Timor-Leste (PNTL) seidauk bele atualiza kona-ba motivu husi kazu ne’e.
“Sidadaun Indonézia ne’e la’o ho grupu kasadór sira, depois mate iha ita-nia rai laran, ne’e indísiu ne’ebé mak ita iha, depois identifikasaun tanba saida mak nia mate ne’e iha prosesu investigasaun sei la’o hela ne’ebé ha’u labele adianta buat-ida lai kona-ba ida-ne’e hein rezultadu investigasaun ne’e”, nia hakotu.
Notísia relevante: Timor-Leste no Indonézia iha kompromisu atu rezolve fronteira marrítima
Jornalista : Natalino Costa
Editora : Rita Almeida
