Projetu konstrusaun morru husi PNDS iha progresu
VIKEKE, 21 Agostu 2025 (TATOLI)—Xefe Suku Bahatata, Postu Administrativu Uatukarbau, Munisípiu Vikeke, Patrício Maria Pinto relata projetu konstrusaun morru satan rai ba sede suku, postu saúde no kapela hamutuk metru 120 husi Programa Dezenvovimentu Nasionál Suku (PNDS) atinje ona 20%.
“Projetu PNDS ba tinan 2025 ne’e ami prioridade ba konstrusaun morru satan rai ba ami-nia sede suku, postu saúde no kapela. Obra ne’e ami hahú implementa iha 6 Agustu ne’e hodi mobiliza eskavatór no hahú halo serbisu konstrusaun morru ne’e ho ninia naruk hamutuk metru 120. Ami-nia progresu servisu daudaun ne’e atinje ona 20%,” Patrício hateten ba TATOLI iha Postu Uatukarbau, Kinta ne’e.
Autoridade ne’e dehan obra ne’e tenke konkluida iha loron 31 Outubru 2025, tanba ne’e agora sira esforsu hodi aselera obra referida.
Tuir nia katak loloos ne’e obra ne’e implementa iha fulan-Juñu maibé tanba udan entaun fó impaktu ba transporte labele asesu bá Suku Bahatata.
“Tempu udan labele transporta materiál ba fatin konstrusaun. Maibé, agora daudaun ami-nia materiál hanesan simente, besi, fatuk no rai-henek iha hotu fatin konstrusaun, ne’ebé bele hala’o serbisu,” nia subliña.
Obra ne’e envolve badaen lokál sira iha Suku Bahatata ne’ebé fahe ba grupu haat. Kada grupu traballadór na’in haat. Totál traballadór hamutuk na’in-16. Enukantu, morru satan rai ne’ebé totál metru 120 ne’e sei gasta orsamentu PNDS hamutuk $28.598,61.
Jornalista: Vitorino Lopez da Costa
Editór: Xisto Freitas da Piedade
