BOBONARU, 21 Agostu 2025 (TATOLI)—Ministériu Administrasaun Estatál (MAE) hamutuk ho Autoridade Munisipál Bobonaru (AMB), Kinta ne’e, entrega apoia orsamentu ho montante $1.285,50 inklui ai-han ba Igreja Parókia Nossa Senhora Maria Imaculada da Conceição, Postu Administrativu Bobonaru hodi halo preparasaun simu vizita Krúz Joven Internasionál durante loron haat.
Apoia ai-han ne’e kompostu husi foos hamutuk saka 218, supermie kaixa 41, bee kopu kaixa 119, bebida kaixa haat (4) no mina-sona masa ida (1) hodi prepara ba sarani sira.
Vise-Ministru Administrasaun Estatál, Jacinto Rigoberto informa apoia ne’e bazeia ba despaxu husi Ministru Estatál, Tomás do Rosário Cabral hodi responde pedidu ne’ebé Amu Parókia no Komisaun Organizadora submete ba Autoridade Munisipál Bobonaru.
“Ami buka meiu oinsá atu suporta Amu Parókia no Komisaun Organizadora hodi halo preparasaun simu Krúz Joven Internasionál. Ami lori sasán la barak, maibé maizumenus bele fasilita sarani sira iha-ne’e hodi mai halo orasaun ba Maromak,” Jacinto Rigoberto hateten durante halo intervensaun ba atividade ne’ebé realiza iha Igreja Parókia Bobonaru, Kinta ne’e.
Notísia relevante: Preparasaun vizita Krúz internasionál mai Timor-Leste atinje 75%
Aleinde ne’e, Koordenadór Autoridade Munisipál Bobonaru, Celestino Marques esklarese apoiu orsamentu ne’e maihusi kontribuisaun funsionáriu sira no ai-han ne’e maihusi Autoridade Protesaun sivíl Munisipál Bobonaru, negosiante no emprezáriu lokál sira.
“Ida-ne’e ita hotu-hotu tau hamutuk hodi tulun preparasaun simu Krúz Joven Internasionál liuliu sarani sira sei konsentra hotu iha-ne’e, nune’e sira hotu iha ambiente ne’ebé di’ak, hakmatek depoiz filafali mós ho kondisaun ne’ebé mak di’ak,” atuál Diretór Nasionál Apoia Administrasaun Suku DNAS tenik.
Nune’e mós, Amu Vigáriu Parókia Nossa Senhora Maria Imaculadade da Conceição Postu Administrativu Bobonaru, Padre Henriques agradase ba parte hotu ne’ebé ho laran luak lolo-liman hamutuk hodi suporta eventu internasionál ne’e.
“Ami laiha bu’at ida atu fó filafali. Ami iha de’it orasaun husu atu ita idak-idak halo kna’ar no atividade loron-loron ho di’ak tuir povu no sarani nia hakarak,” nia konklui.
Enkuantu, oportunidade ne’e Komisaun Organizadora mós simu apoia orsamentu $1.000 husi Partidu Kongresu Nasionál Rekonstrusaun Timor (CNRT-sigla portugeza) ne’ebé entrega ofisialmente husi kuadru CNRT Jacinto Rigoberto hodi suporta halo preparativu.
Tuir oráriu, Krúz Joven Internasionál sei to’o iha Timor-Leste, Sábadu (23 Agostu 2025) no Domingu (24 Agostu) sei hela iha Igreja Katedrál Dili.
Iha Segunda (25 Agostu) viajen ba Igreja Pro-Katedrál Maliana. Tersa (26 Agostu) viajen husi Igreja Pro-Katedrál ba Parókia Bobonaru. Kuarta (27 Agostu) no Kinta 28 (Agostu) sei hela iha Parókia Bobonaru. Sesta (29 Agostu) Krúz Joven Internasionál akompañadu ho Krúz Joven Nasionál viajen husi Parókia Bobonaru fila bá Dili no Sábadu (30 Agostu) Krúz Joven Internsionál fila ba Thailándia. Domingu (31 Agostu) misa abertura ba Krúz Joven Nasionál iha Parókia Remexio.
Jornalista: Sergio da Cruz
Editór: Xisto Freitas da Piedade
