KOVALIMA, 21 Agostu 2025 ( TATOLI)–Servisu Munísipiu Edukasaun (SME) Kovalima, oras ne’e, simu ona relatóriu ezekusaun orsamentu konsensaun eskolár faze dahuluk nian husi eskola ensinu báziku no eskola pre-eskolár sira iha Kovalima.
Daudaun ne’e eskola sira submete ona relatóriu kona-ba utilizasaun orsamentu konsesaun eskolár ba faze dahuluk nian nune’e hein de’it ona prosesu osan atu foti konsesaun eskolár ba faze daruak nian,” Diretora Servisu Munisípiu Edukasaun Kovalima, Elda de Fátima relata ba TATOLI, iha Santa Rosa ohin.
Kona-ba ezekusaun orsamentu konsensaun eskolár faze daruak nian, nia dehan, Servisu Munisipál Edukasaun Kovalima sei submete pedidu ba iha servisu munisipál finansa hodi hetan aprovasaun antes aloka ba eskola sira hodi ezekuta.
Tuir matadalan orsamentu konsensaun eskolár ne’e, kada eskola sei ezekuta hodi halo re-abilitasaun ba edifísiu eskola, manutensaun ba fasilidade eskritóriu no mós hadi’a kadeira no meza ne’ebé aat ona no seluk tan.
Iha tinan 2025, Governu aloka orsamentu konsensaun eskolár ba eskola ensinu báziku iha Kovalima hamutuk $ 284,624, no ezekuta ona $ 177,675, no orsamentu konsesaun eskolár ba pre-eskolár hamutuk $ 16,002 husi orsamentu ezekuta ona $ 7,146.00.
Governu liuhosi Ministériu Edukasaun (ME), atribui konsesaun eskolár fahe ba kategória pre-eskolár tuir dekretu lei númeru 84 artigu 7 ne’ebé altera husi dekretu lei númeru 3/2016 kona-bá estatutu administrasaun munisipál.
No kategoria konsesaun eskolár ba ensinu báziku tuir dekretu lei númeru 32/2023 artigu 69 kona-ba gastu orsamentu konsesaun eskolár tuir nesesidade eskola.
Konsesaun eskolár ba ensinu pre-eskolár ne’e responsabiliza husi munisipál ho nia orsamentu kada estudante $ 0.75 no ensinu báziku reponsabiliza hosi Ministériu Edukasaun ho nia orsamentu kada estudante $ 2.00.
Entretantu, tuir dadus estudante ensinu pre-eskolár públiku iha tinan 2024 hamutuk 1.604 ho ninia orsamentu ba fulan neen nian hamutuk $ 7,812.00 husi orsamentu inisiál $ 15,705.00.
Enkuantu, konsensaun eskolár ba estudante ensinu báziku 20-resin no filial 63 ho totál estudante 14.174 ho total orsamentu hamutuk $170,088.00.
Jornalista :Celestina Teles
Editór:Florencio Miranda Ximenes
