OEKUSI, 22 Agostu 2025 (TATOLI) – Vise-Ministra Solidariedade Sosiál no Inkluzaun (MSSI), Céu Brites, apela ba Funsionáriu Sentru Solidariedade Sosiál no Inkluzaun (SSI) Rejiaun Administrativa Espesiál Oekusi Ambeno (RAEOA) atu mellora atendimentu serbisu ba komunidade sira-ne’ebé ho kondisaun vulneravel, nune’e bele rekolla dadus atu hetan apoiu umnitária iha futuru.
“Enkontru ohin ne’e, ha’u rekomenda, katak ita nu’udar tékniku sosiál, ita tenke la’o, ba vizita komunidade sira iha baze hamutuk ho autoridade lokál sira, xefe suku no xefe aldeia sira, tama sai uma atu haree kondisaun ita-nia sidadaun sira, se sidadaun ida-ne’ebé presiza duni tulun, ita buka oinsá atu fó solusaun, oinsá bele responde emerjénsia, maske ita labele fó direita maibé ita bele fó hanesan materiál, karik laiha meiu seluk bele komunika ba nasionál hodi tau atesaun, tanba misaun MSSI nian mak tulun família vulneravel sira,” Vise-MSSI Céu Brites informa, iha ámbitu enkontru ho funsionáriu sira iha Sentru Solidariedade Sosiál no Inkluzaun Oekusi.
Tanba, tuir nia, pasu importante ida atu hala’o mak ne’e, tenke koordena didi’ak ho servisu saúde, atu bainhira halo pagamentu ba ita-nia idozu sira, saúde, notariadu, STAE sira-ne’e tenke ba hotu, nune’e bele haree ema ruma iha problema ho saúde, konsulta kedas iha fatin ne’e, duke hein bainhira mak to’o uma hodi ba fasilidade saúde, no mós karik dokumentu iha problema bele hadi’a kedas.
“No mós abitasaun uma tanba balun laiha kondisaun, maibé Ministériu laiha kbiit no lei la fó dalan atu harii uma, mas ne’e la’ós ita la serbisu, maibé tékniku iha gabinete ministériu serbisu hamutuk ho tékniku husi Vise-Ministru ba Asuntu Sosiál, atu bele responde ba komunidade ne’ebé kondisaun uma ladun di’ak liu-liu vulneravel sira,” nia hateten.
Notísia relevante:MSSI distribui ona karreta ualu ba nia diresaun sira hodi halo serbisu
Iha biban ne’e, Xefe Departamentu Sentru Solidariedade Sosiál no Inkluzaun Oekusi, Vitór Manuel Paixão, konsidera enkontru ofisiál ne’e, importante, nune’e bao in bele hadi’a di’akliu serbisu liu-liu iha munisípiu.
“Ida-ne’e polítika di’ak husi ministériu, atu hakbesik an ba komunidade sira, durante ne’e mós ami hamutuk ho Autoridade RAEOA, maibé komesa fulan-Abril to’o agora ami tutela direita ona nasionál la hanesan uluk, entaun fulan ne’e, ami esforsa atu rekolla fali dadus ba família vulneravel sira iha baze. Ne’ebé, rekomendasaun ohin, ami gradese tebes, tanba bele enkoraja liután atu reforsa serbisu sosiál iha Oekusi,” nia orgullu.
Notísia relevante:Vise-MSSI Céu Brites apoia nesesidade bázika ba pasiente psikososiál iha Oekusi
Entretantu, tuir observasaun iha ámbitu enkontru ne’e, dirijente sira iha Sentru Solidariedade Sosiál no Inkluzaun Oekusi, inklui Institutu Nasionál Seguransa Sosiál (INSS) hato’o mós preokupasaun no rekomendasaun liuliu ba asuntu sosiál nian iha Oekusi.
Jornalista: Abílio Elo Nini
Editór: Rafael Ximenes de A. Belo
