SEFOPE lansa projetu PLMSP “Scale-Up” iha Timor-Leste

DILI, 22 Agostu 2025 (TATOLI)—Sekretária Estadu Formasaun Profisionál no Empregu (SEFOPE), sesta ne’e, lansa projetu Programa Apoiu Mobilidade Traballu Pasífiku ka Pacific Labour Mobility Support Program (PLMSP) Scale-Up iha Timor-Leste.

“Serimónia lansamentu ba projetu Programa Apoiu ba Mobilidade Laborál Pasífiku (PLMSP) Scale-Up iha Timor-Leste importante tebes ba dezenvolve abilidade ita-nia traballadór sira-ne’ebé prontu atu ba servisu iha rai-li’ur,” Sekretáriu Estadu Formasaun Profisionál no Empregu, Rogério Araújo Mendonça, hateten ba jornalista sira iha Timor-Plaza, ohin.

Nia informa, tinan barak ona, traballadór sira servisu iha Austrália no Korea ho kualifikasaun ne’ebé ki’ik tebes, tanba ne’e lansamentu ida-ne’e ho objetivu atu hasa’e sira-nia koñesimentu.

“Antes ne’e, ami-nia traballadór sira mai iha ne’e hodi serbisu iha ortikultura no agrikultura. Nune’e liuhosi lansamentu ne’e, ami-nia traballadór sira bele habelar sira-nia abilidade no serbisu iha koa na’an, ospitalidade no arte kulinária. Ami bele hateten de’it katak lansamentu ne’e hanesan benefísiu boot ida ba ami-nia traballadór sira,” nia dehan.

Embaixadora Austrália iha Timor-Leste, Caitlin Wilson, ofisialmente lansa projetu ne’e hodi hasa’e abilidade traballadór timoroan sira-nian iha mobilidade laborál iha Timor-Leste.

“Ha’u agradese tebes ba programa PALM ne’ebé buras daudaun iha Timor-Leste no ba investimentu ida-ne’e husi ami-nia primeiru-ministru na’in-rua iha fulan-Dezembru tinan kotuk. Iha ami-nia parseria laborál, ami lansa projetu foun ida ohin,” nia dehan.

Nia dehan, parseria laborál ne’e la’ós de’it atu hasa’e númeru traballadór sira-nian maibé mós kona-ba sira-nia abilidade servisu no kria ligasaun bilaterál ne’ebé metin entre Austrália no Timor-Leste.

Jornalista : Felicidade Ximenes

Editór       : Cancio Ximenes