DILI, 22 Agostu 2025 (TATOLI)—Sekretária Estadu Formasaun Profisionál no Empregu (SEFOPE) asina kontratu ba programa estájiu profisionál espesiál iha rai-laran durante fulan haat ho traballadór returnu n’ain-32 kompostu husi feto na’in-14 no mane na’in-22, ne’ebé antes ne’e hala’o ona servisu iha Pacific Australia Labour Mobility (PALM) maibé to’o agora seidauk hetan oportunidade servisu to’o agora.
Sekretária Estadu Formasaun Profisionál no Empregu, Rogério Araújo Mendonça, hateten ba benfisiáriu sira katak Governu la abandona (husik) imi bainhira termina ona imi-nia servisu iha rai-li’ur.
“Programa estájiu profisonál ida-ne’e importante hodi liga imi ba iha área administrasaun públiku nian,” Sekretáriu Estadu ne’e informa ba jornalista sira iha salaun VIP-SEFOPE, Kaikoli, ohin.
Iha programa ida seluk mós mak reintegrasaun traballadór, katak imi sira-ne’ebé balun ba servisu ona iha rai-li’ur hanesan Austrália, Korea, iha ona esperiénsia maibé finansiamentu ba imi mak laiha.
“Tanba ne’em Timor-Leste nafatin servisu hamutuk ho Governu Austrália liuhusi programa Pacific Australia Labour Mobility hodi tau matan nafatin ba traballadór reformadu sira, ne’ebé fila husi Austrália atu kontinua kria empregu ba imi-nia an rasik,” nia dehan.
Nia apela, ohin imi hetan ona oportunidade ba estájiu profisionál no nia fiar katak husi benefisiáriu na’in-36 ne’e bele hatudu prestasaun servisu ne’ebé di’ak iha instituisaun Governu no mós kompania sira, esperansa boot 80% bele mantein servisu no 20% mak fila.
Estajiada, Elvira Martins Sequeira, sente kontente bele hetan oportunidade kontinua envolve iha programa estájiu profisonál nian, nune’e bele aumenta tan ninia kapasidade iha área seluk ne’ebé nia presiza aprende ba.
“Maske antes ne’e ha’u servisu ona iha Austrália área ortikultura nian durante fulan sia, maibé bainhira ha’u-nia kontratu termina, ha’u fila mai Timor seidauk hetan servisu to’o agora,” benefisiária ne’e informa.
Tamba ne’e, nia fiar katak liuhusi programa Governu nian ne’e, nia bele aproveita di’ak oportunidade durante fulan haat nia laran no sei hatudu atitude ne’ebé di’ak ba promotór sira.
Entretantu, iha tinan ida-ne’e programa estájiu profisionál iha oin tolu hanesan, estájiu profisionál rai laran iha benefisiáriu nain 33, estájiu profisionál rai-li’ur nia benefisiáriu na’in-ualu (8), estájiu profisionál espesiál ba returnu PALM hamutuk nain 22, nune’e totál benefisiáriu hamutuk nain 113 kompostu husi feto 52 no mane 61.
Jornalista : Alexandra da Costa
Editór : Cancio Ximenes
