KOVALIMA, 25 Agostu 2025 ( TATOLI)- Konsellu Munisipál Kombatente Libertasaun Nasionál (CMCLN,s igla-portugés), segunda ne’e, realiza konferénsia ba daruak hodi hili estrutura Munisípiu Kovalima ba Periódu 2025-2030.
Konferénsia ba daruak na’in ba ukun aan no riin ba nasaun ho tema “Hametin unidade ba Dezenvolmentu Nasionàl”
Biban ne’e, Ministru Asuntu Kombatente Libertasaun Nasionál (MAKLN), Gil da Costa “Oan Soru” husu ba veteranu atu hametin unidade no veteranu tenke disiplina
“Veteranu sira tenke disiplina, nune’e ita nia oan no jerasaun sira bele sente unidade no bele sente ita-nia disiplina iha kualker atividade. Tanba bainhira laiha disiplina demokrasia sai anarkizmu”, Ministru Oan Soru hato’o liuhusi nia diskursu iha otél Vila Nova-Kovalima, ohin
Governante fó hanoin ba deleganu no delegada sira atu labele fó dalan ba ema atu politiza komisaun ne’e hodi fó dalan bá veteranu sira fahe malu.
Bazeia ba artigu 34 iha estatutu kombatente libertasaun nasionál hodi ko’alia kona-ba dever kombatente sira atu kontribui ba dezenvolvimentu no estabilidade sosiál no kontinua hala’o atu asegura naran di’ak husi luta libertasaun ba rai ida-ne’e
“ Ha’u hatete Veteranu la’ós ita-boot sira-nia naran apelidu maibé veteranu hanesan responsabilidade”, nia dehan
Iha sorin seluk , Prezidente Konsellu Kombatente Libertasaun Nasionál (CCLN), Vidál de Jesus “Riak Leman” mós alerta ba Veteranu sira presiza unidade.
“ Ita lakohi rona malu ,ita na’in ba ukun rasik aan riin ba nasaun di’ak liu hasai tiha,tanba veteranu iha mak ohin loron ita ukun rasik aan,tanba ne’e tenke rona malu,”nia fó hanoin.
Unidade veteranu hahú mihis tanba veteranu sira la unidade no la hatene atu halo jestaun nune’e konsellu hamri’ik hodi kria unidade.
Konferénsia Munisipál CMCLN iha Kovalima partisipa husi konferénsista ne’ebé mai husi postu administrativu hitu hamutuk na’in-350 ne’ebé veteranu dedikasaun eskluziva 8-15,15-19 no 20-24.
Konfrensista ne’ebé mak partisipa ne’e kada postu ema na’in-50 mai husi postu Fatululik, Fatumea,Fohorem Tilomar, Maucatar Suai no Zumalai.
Notisia relevante: CMCLN Baukau realiza konferénsia ba daruak hili estrutura períodu tinan-lima
Jornalista:Celestina Teles
Editór :Florencio Miranda Ximenes
