DILI, 25 Agostu (TATOLI)-Ministru Transporte no Komunikasaun, Miguel Marques Gonçalves Manetelu, hateten Governu Timor-Leste foin iha servisu inisiál ho google Indonézia, maibé iha futuru ne’e, Governu planeia no halo kooperasaun forte liután hodi estabelese Google nia sukursál ida iha Timor-Leste.
Notísia Relevante: MTK konsidera teknolójia mak instrumentu ba empoderamentu
“Entaun, daudaun ne’e ita iha hela faze inisiál ida ba kooperasaun neʼebé hahú atu halo agora no mós ba futuru oin mai. Governu Timor-Leste nia objetivu mak lori Google sira mai iha Timor-Leste, la’ós liuhisi servisu hamutuk fali ho Google sukursál iha Indonézia,” Governante ne’e hateten ba jornalista sita hafoin semináriu internasionál ne’ebé realiza entre Ministériu Transporte Komunikasaun no parseria Telkomsel inklui Ministériu Edukasaun ho tema “Driving digital transformation in Timor-Leste: Leveraging open-source platforms for innovation and skills“, iha Sentru Konvensaun Dili (CCD), Kaikoli, ohin.
Governu planeia atu halo kooperasaun ho Google maibé depende ba Ministériu Transporte Komunikasaun no Ministéria Edukasaun oinsá mak bele servisu hamutuk, tanba MTL labele hakat liu asuntu neʼebé la’ós ninia área maibé nia fasilita lori mai de’it, tanba buat sira-ne’e presiza rekursu.
Tuir reprezentante google iha Indonézia, Olivia Husli Basrin, hateten tanba ida-ne’e servisu hamutuk ba dahuluk nian entre Google Indonézia no Timor-Leste normalmente sira presiza observa kreximentu husi poténsia kolaborasaun Ministériu relevante ida-ne’e.
“Nune’e, daudaun ne’e ami seidauk bele fó kompromisu atu estabelese sukursál Google iha ne’e, maibé baibain ne’e ami sempre prontu ajuda nasaun sira-neʼebé hakarak halo transformasaun dijitál,” nia dehan.
Enkuantu nasaun ne’ebé mak google Indonézia sira servisu hamutuk iha nivél nasionál ba setór edukasaun ne’e mak hanesan Malázia, Singapura, Japaun, Korea Súl, Austrália, Nova-Zelándia, Amérika, Kánada, Brazíl inklui Timor-Leste.
Notísia Relevante: Prezensa teknolojia dijitál la’ós substitui papél profesór sira-nian iha eskola
Jornalista : Alexandra da Costa
Editór : Cancio Ximenes
