MAE entrega karreta hitu ba Administrasaun munisípiu Bobonaru
DILI, 25 Agostu 2025 (TATOLI)—Governu liuhusi Ministériu Administrasaun Estatál (MAE), Segunda ne’e, entrega karreta ba Autoridade munisípiu Bobonaru hodi reforsa serbisu iha terrenu.
“Ohin distribui karreta hitu ba administradór postu administrativu Bobonaru hodi fasilita sira halo serbisu iha terrenu ho di’ak. Ne’ebé ohin ita entrega direta karreta ho marka Hilux neen ne’e ba Administradór postu administrativu na’in-neen no kamioneta ida hodi utiliza ba raut foer iha munisípiu Bobonaru,” Ministru Administrasaun Estatál, Tomas do Rosario Cabral, informa ba jornalista sira, iha resintu edifísiu MAE, Kaikoli.
Karreta hirak ne’e Administradór neen atu utiliza hodi halo serbisu iha terrenu, liuliu tun bá suku hodi hakbesik-an ba komunidade hodi halo kontrolu atu nune’e problema labele akontese iha terrenu.
Biban ne’e, Ministru husu Administradór postu sira atu uza karreta ho responsabilidade másimu no bainhira mai Dili tenke uza guia de marsa no halo relatóriu, atu nune’e bainhira akontese buat ruma iha terrenu bele hatene lalais, tanba dalabarak akontese iha terrenu, direjente balun viajen la halo guia de marsa.
“Karreta hitu ne’e sei taka hotu stiker Ministériu Administrasaun Estatál iha karreta nia odamatan hodi nune’e ema bele hatene karreta ida-ne’e Ministériu ida ne’ebé nian ka munisípiu ka postu nian no halo atividade saida,” nia akresenta.
Iha fatin hanesan, Prezidente Autoridade munisípiu (PAM) interinu Bobonaru, Celestino Marques, informa, Autoridade munisípiu Bobonaru iha tinan 2025 hetan alokasaun orsamentu $500.000 iha kategoria Kapitál Menór.
“Entaun, totál orsamentu ida-ne’e hodi sosa ekipamentu hanesan karreta hamutuk 10, sosa motorizada haat, sosa ekipamentu informátika (komputer 20 no printer 20), sosa mobiliáriu ba postu Administrativu sira hanesan sound system,” nia tenik.
Notísia relevante : MSSI distribui ona karreta ualu ba nia diresaun sira hodi halo serbisu
Karreta 10 kompostu husi neen hodi apoiu ba postu administrativu sira, Autoridade munisípiu Bobonaru utiliza karreta rua ba operasionál, kamioneta ida hodi apoiu Servisu Munisipal Agua, Saneamentu no Ambiente (SMASA) no karreta funeráriu 1 apoiu asaun sosiál.
“Ne’ebé karreta hitu iha ne’e ona. Karreta funeráriu no operasionál sei mai iha Setembru nian laran. Motorizadu haat distribui hotu ona ba servisu Munisipál sira mak hanesan Servisu Munisipál Estrada no Ponte (SMOPT) ida, Servisu Munisipál Seguransa Alimentár ida, Servisu Munisipál Jestaun Merkadu no Turizmu ida no Servisu Munisipál Apoiu Organizasaun Naun Governamentál (ONG) no AC ida,” Ministru esplika.
Ekipamentu informátika sei mai iha fulan-Setembru nian laran, bainhira to’o ona sei distribui hotu Servisu Postu Administrativu hodi reforsa servisu administrasaun munisipál.
“Veikulu hirak ne’e la’ós veíkulu kargu, maibé Veíkulu operasionál, husu atu utiliza hodi’ak ho responsabilidade, kumpre regra utilizasaun veíkulu Estadu ninian,” PAM interinu hameno.
Jornalista : Osória Marques
Editora : Julia Chatarina
