DILI, 25 Agostu 2025 (TATOLI)—Bispu Dioseze Baukau, Dom Leandro Maria Alves konsidera prezensa Krús Joven Internasionál iha Timor-Leste nu’udár momentu atu timoroan fó liman no perdua malu tanba Krús hanesan símbulu husi Na’i Maromak nia domin ne’ebé reprezenta liuhosi Jezús Kristu.
Dom Leandro Alves esplika prezensa Maromak nian atu hahi no halibur ema hotu ne’ebé iha lisan diferensa hodi akomula hamutuk iha Maromak nia lisan ne’ebé hanaran domin ne’ebé deside liuhosi Mesias Jezús Kristu Maromak nia oan mane.
“Ema hotu-hotu iha mundu ne’e sei haree Maromak nia tulun ne’ebé la’ós liuhosi sasán kro’at sira maibé liuhosi domin, liuhosi perdua malu no haree malu hanesan maun-alin.
“Maromak hatudu nia espíritu liuhosi Krús. Krús mak sinál perfíl Maromak nian. Krús nu’udár sinál domin. Husi Krús mak Maromak hatudu domin no hakarak hakuak ema hotu-hotu,” Bispu Dioseze Baukau hateten bainhira selebra Misa Krús Joven Internasionál iha Igreja Katedrál Dili, Domingu ne’e.
Notísia relevante: Voluntáriu 250 envolve iha atividade Krús Joven Internasionál
Dom Leandro haklaken liuhosi Krús tutun Jezús hatudu domin hodi hakuak ema hotu no liatun hodi dehan Aman perdua ba sira-nia hahalok maski sira lahatene buat ne’ebé sira halo, iha-ne’ebé dekreve katak Maromak lakohi lakon no hakarak hakuak ema hotu-hotu.
Nia hateten mundu agora halo ema lahatene perdua no haraik aan ba malu ne’ebé akontese mós iha Timor-Leste, ne’e hahú husi uma-laran hanesan família sira la perdua no haree malu, lakon espíritu perdua ba malu nune’e prezensa Krús Joven Internasionál lori domin no sei hakuak ema hotu-hotu liuliu juventude timoroan sira atu hatene perdua malu no kria pás no domin.
“Prezensa Krús iha ita-nia leet ne’e atu fanu ita-nia na’i-ulun to’o sira-ne’ebé ki’ikliu atu hateke ba Krús Kristu nian ne’e atu hamoris aan la’ós de’it liafuan maibé liuhosi perdua malu,” Dom Leandro hato’o mensajen.
Entretantu, Krús Joven Internasionál ohin lori ona ba Dioseze Maliana, ne’ebé tuir oráriu sei fila-mai Dili iha 29 Agostu no sei dezloka husi Timor-Leste ba Thailándia iha 30 Agostu ne’ebé sei realiza misa enserramentu no prezide misa husi Bispu Dioseze Dili, Dom Virgílio Kardeál do Carmo da Silva, SDB.
Jornalista: Natalino Belo
Editór: Xisto Freitas da Piedade
