DILI, 22 Agostu 2025 (TATOLI)—Voluntáriu Katólika Timor-Leste hamutuk 250 ho moto ‘Hadomi no Serví’, ne’ebé forma hodi fó apoia ba preparasaun vizita Papa Francisco iha tinan kotuk, dala-ida tan fó apoia ba atividade boot Igreja Katólika iha Timor-Leste, ba preparasaun simu Krús Joven Katólika Mundiál ne’ebé sei to’o iha loron 23 Agostu 2025.
Voluntáriu Katólika Timor-Leste, António Soares da Silva, haktuir, antes ne’e, Komisaun Nasionál Juventude Katólika Timor-Leste (CNJCTL, sigla portugés) halo selesaun ba voluntáriu sira, nune’e konsege hili joven balun hodi fó apoia ba atividade sira.
“Husi voluntáriu na’in-250, agora ami halo hela preparasaun sira hanesan lojístika, publisidade, protokolu, no seguransa iha Katedrál nian Ami-nia foku prinsipál maka lojístika no promosaun espirituál, atu nune’e movimentu relijiozu sira bele mai iha ne’e no rai sira-nia ekipamentu iha área ne’ebé prepara ona,” António Soares, informa ba Ajénsia TATOLI, iha Igreja Katedrál, Sesta ne’e.
Prosesu preparasaun tomak maizumenus atinje ona 97% tanba falta de’it mak sei halo simulasaun ba protokolu simu Krús Joven nian iha Aeroportu Internasionál Prezidente Nocolau Lobato, Komoro – Dili.
Nia subliña, maski voluntáriu sira mai husi orijen oioin, balun harii ona família, balun eskola hela ka foin-sa’e maibé sira-nia kompromisu ba Igreja Katólika metin nafatin.
“Ami mesak voluntáriu de’it, maibé ami-nia fuan ba Igreja Katólika boot tebes. Ami kontente katak serbisu ne’e kontinua. Atu paisaun ne’e nunka mohu,” nia katak ho emosionadu.
Notísia relevante : KNJK-TL forma ekipa sinodal ba preparasaun vizita krús joven internasionál
Iha sorin seluk, Voluntária Katólika Timor-Leste, Maria Magalhães, sente kontente tanba hetan fiar husi uma kreda atu envolve iha atividade igreja nian.
“Ha’u pesoalmente haksolok tebes bele envolve fali iha eventu ne’e. Ha’u hein katak vizita Krús ne’e sei lori dame no domin ba ita hotu, liuliu prezensa Krúz Joven ne’e bele muda foin-sa’e sira-nia hanoin, hadook-an husi konflitu, hapara violénsia, no haburas espíritu dame nian iha ita-nia leet,” Maria tenik.
Servisu voluntáriu ‘Hadomi no Servi’ ne’e rasik hanesan rezultadu husi prosesu selesaun ida hosi Igreja Katólika Timor-Leste, ho inskrisaun online ne’ebé loke iha loron 07 Juñu 2024, hodi rekruta voluntáriu 1.000.
Programa ne’e lansa ofisialmente husi Amu Bispu Metropolitanu Dili, Dom Virgílio Kardeál do Carmo da Silva, iha loron 29 Juñu 2024, nu’udar parte ida husi preparasaun ba Amu Papa Francisco nia vizita mai Timor-Leste iha loron 09 to’o 11 Setembru 2024.
Adjuntu Koordenadór Jerál Ekipa Voluntáriu, Irmaun Nico Lay, hateten, voluntáriu hotu husi ‘Hadomi no Serví’ sei envolve fali iha misa komemorasaun aniversáriu dahuluk Papa Francisco nia vizita, ne’ebé sei hala’o iha Tasi-tolu iha fulan-Setembru oin mai.
“Husi voluntáriu 1.000 ne’e, 250 mak daudaun envolve hodi simu Krús Mundiál Juventude. Maibé ba misa iha Tasi-tolu, voluntáriu hotu sei partisipa,” nia hato’o.
Jornalista : Arminda Fonseca
Editora : Julia Chatarina
