Prezidente Repúblika vizita área turístika iha dezertu Rub al-Khali
ABU DHABI, 14 Novembru 2026 (TATOLI)—Prezidente Repúblika (PR), José Ramos-Horta, ho delegasaun iha Domingu ne’e vizita área turístika iha dezertu Rub al-Khali, iha rejiaun Liwa, Abu Dhabi, Emiradu Árabe Unidu (EAU).
Iha ámbitu vizita Estadu bá Abu Dhabi, Xefe Estadu no delegasaun aproveita oportunidade ne’e hodi haree diretamente dezenvolvimentu área dezertu nian ne’ebé transforma sai destinasaun turístika no kulturál, nu’udár parte husi esforsu atu diversifika ekonomia liuhusi setór turizmu.
Vizita ne’e inklui atividade oioin, hanesan sa’e kamelu, halo viajen ho kareta iha rai-henek, haree loron monu, jantár iha kalan no asiste animasaun múzika instrumentál tradisionál iha área dezertu.
Dezertu Rub al-Khali, ne’ebé mós hanaran Empty Quarter, mak área rai-henek kontinua boot liu iha mundu, ho área ne’ebé kobre parte husi Arab Saudi, EAU, Omán no Iémen. Iha EAU, área Liwa iha Abu Dhabi sai nu’udár asesu importante ba parte dezertu ida-ne’e.
Área ne’e koñesidu ho rai-henek ho kór douradu no foho-rai-henek (sand dunes) ne’ebé aas, ne’ebé sai atrasaun prinsipál ba turista. Atividade turístika sira inklui safari ho kareta 4×4, sa’e kamelu, sandboarding, kamping, hela kalan iha dezertu no haree paisajen naturál, inklui loron monu.
Entre fatin turístiku importante iha área ne’e mak Qasr Al Sarab Desert Resort, hotel ida-ne’ebé lokaliza iha paisajen rai-henek Rub al-Khali nia klaran. Iha-ne’ebá, turista bele hela kalan, sa’e kamelu, halo safari no disfruta paisajen dezertu nian.
Fatin seluk mak Tel Moreeb, ne’ebé koñesidu nu’udár foho-rai-henek ida aas liu iha área Liwa, ho altura liu metru 300. Fatin ne’e sai pontu atrativu ba vizitante sira-ne’ebé hakarak haree paisajen dezertu no halo fotografia.
Liwa Oasis mós sai fatin importante ida, ho ai-tamariña barak, fonte bee no istória kulturál komunidade Beduínu, ne’ebé durante jerasaun barak moris no adapta-an ba ambiente dezertu nian.
Embaixadór Timor-Leste ba EAU, Rui Hanjan, hateten katak vizita ne’e sai oportunidade ba delegasaun atu esplora istória no kultura EAU nian.
Diplomata timoroan ne’e esplika katak kamelu, ne’ebé iha tempu uluk uza nu’udár meiu transporte tradisionál iha moris loroloron, agora transforma mós sai atrasaun turístika ne’ebé dada atensaun vizitante sira.
Vizita ne’e akompaña mós husi Embaixadór Naun-Rezidente EAU ba Timor-Leste, Abdulla Salem Al Dhaheri, no membru delegasaun sira seluk.
Dezenvolvimentu setór turizmu importante ba país idaidak tanba bele kontribui ba kreximentu ekonómiku nasionál, kria oportunidade empregu no rendimentu ba komunidade, no hamenus dependénsia ba rekursu naturál, inklui Fundu Petrolíferu.
Kontestu
Dezenvolvimentu turizmu iha Abu Dhabi, liuliu iha rejiaun Liwa no dezertu Rub al-Khali, hatudu oinsá EAU aproveita rekursu naturál, paisajen dezertu no patrimóniu kulturál atu dezenvolve destinasaun turístika.
Liuhusi atividade hanesan safari, sa’e kamelu, kamping no esperiénsia kultura Beduínu, área ne’e sai atrasaun ba turista nasionál no internasionál. Ezemplu ida-ne’e bele sai referénsia ba Timor-Leste atu esplora potensiál turizmu naturál no kulturál nu’udár fonte alternativa ba kreximentu ekonómiku.
Klik notísia relevante sira iha kraik hodi lee:
- Informasaun kona-ba Liwa, Rub al-Khali, kultura Beduínu, safari no Tel Moreeb. Lee informasaun kona-ba tradisaun dezertu iha Abu Dhabi.
- Informasaun kona-ba hotel turístiku, atividade sa’e kamelu no esperiénsia turizmu iha dezertu. Lee informasaun kona-ba Qasr Al Sarab.
- Informasaun jeográfika no karakterístika naturál dezertu Rub al-Khali. Lee informasaun jeográfika kona-ba Rub al-Khali.
- Informasaun kona-ba Rub al-Khali nu’udár área rai-henek kontinua boot liu iha mundu. Lee dadus kona-ba dezertu rai-henek boot liu iha mundu.
Jornalista: Nelson de Sousa
Editór: Xisto Freitas da Piedade
