Kontrusaun ICC hein aprovasaun OJE 2027
DILI, 13 Novembru 2026 (TATOLI)-Ministru Planeamentu no Investimentu Estratéjiku, Gastão de Sousa, informa katak konstrusaun Sentru Konvensaun Internasionál (ICC, sigla inglés) Dili hein aprovasaun Orsamentu Jerál Estadu (OJE) 2027. Governu destina orsamentu ho montante millaun US$291 ba konstrusaun infraestrutura ne’e.
Ministru esplika katak ida-ne’e responsavel másima ba implementasaun ne’e husi Ministériu Koordenadór Asuntu Ekonómiku (MKAE), maibé kontratu kona-ba nia fiskalizasaun sei mai iha Ajénsia Dezenvolvimentu Nasionál (ADN) no Komisaun Nasionál Aprovizionamentu (CNA).
“MPIE sempre iha koordenasaun ho MAKE. Ba projetu ne’e osan iha Fundu Infraestrutura ho valór millaun $291-resin, maibé kontratu depoizde orsamentu 2027 aprova mak foin hala’o. Montante loloos ba orsamentu ne’e bainhira kontratu asina mak foin deside. Ba konstrusaun fízika tenke aprova OJE 2027”, Gastão de Sousa hatete liuhusi Meet the Press ne’ebé hala’o iha Maliana, ohin.
Enkuantu esforsu balun ne’ebé daudaun Governu halo ona mak prepara kontratu atu selu ba projetu Dezeñu Enjiñaria Detallu ne’ebé osan aloka iha MKAE hamutuk millaun $5.
Lembra katak, iha 10 Novembru 2026, iha debate jeneralidade ba OJE 2027, Primeiru-Ministru, Xanana Gusmão, esplika katak Governu deside konstrui Sentru Konvensaun Internasionál iha Dili, ho razaun nu’udar rekizitu ida ba Timor-Leste hodi asume Prezidénsia ASEAN iha 2029.
Xanana esplika katak, maski Timor-Leste iha ona Sentru Konvensaun Dili (CCD), ne’ebé mós iha kapasidade boot, konstrusaun ICC nafatin nesesáriu atu kumpre rekizitu sira ba organizasaun enkontru iha ASEAN Summit iha 2029.
Notísia relevante: Xanana: ICC sai rekizitu ba Timor-Leste atu asume Prezidénsia ASEAN iha 2029
Jornalista: Arminda Fonseca
Editor: Maria Auxiliadora
