DILI, 30 Juñu 2025 (TATOLI)-Konferénsia Episkopál Timorense (CET, sigla portugés) liuhusi Komisaun Nasionál Juventude Katólika Timor-Leste (CNJC-TL, sigla portugés) forma ekipa sinodal ne’ebé kompostu husi juventude dioseze Dili, Maliana no Baukau ba preparasaun vizita krús joven internasionál iha Timor-Leste.
Prezidente Ezekutivu KNJK-TL, Pe. Francisco Indra do Nasscimento Teyseran, hateten tinan ne’e hanesan grasa ba kreda Timor, liuliu ba foinsa’e Katólika sira, tanba kreda Timor sei hetan vizita krús joven internasionál ho tema “Aten brani ba, ha’u manán ona mundu”.
Padre Indra hatutan KNJK-TL mak kargu ofisiál husi CET ne’ebé hakna’ar nu’udar reponsavél ba asuntu pastorál foinsa’e Katólika nian iha kreda Timor. Tema 2025 hanesan tinan Jubileu ordináriu ida no maktoban Santu Padre Francisco foti hanesan tinan jubileu esperansa ho bulla “Spes Non Confundit” ka esperansa labosok.
“Nune’e Konferénsia Episkopál Timorense fó konfiansa ba KNJK-TL hodi sai n’udar responsavél másimu iha vizitasaun krús joven internasionál iha kreda Timor”, Prezidente Ezekutivu KNJK-TL ne’e informa ba jornalista sira iha salaun Ekleziastíku Arkiodioseze, Bidau Lecidere, ohin.
Amu Indra dehan KNJK-TL organiza hodi forma ekipa traballu ne’ebé hanaran ekipa sinodal hamutuk nain-76 no envolve foinsa’e sira husi komisaun Diosezana, movimentu juveníl Katólika no universitáriu sira hodi bele halo preparasaun ba eventu referidu.
“Aleinde ne’e iha tinan-ne’e mós kreda Timor sei selebra festa fiar foinsa’e sira nian ne’ebé hanaran jornada nasionál juventude habadak ba JNJ ho Icon krús joven ne’ebé sei realiza iha Diozese Maliana, Parókia Bobonaru ho tema “Ha’u Hamrok”, amu-lulik ne’e esplika.
Jornada nasionál juventude durante ne’e hahú iha tinan-2018 no la’o ona ba dala-neen, tanba antes ne’e Illas krús joven ba vizita ona fatin sira hanesan, Letefoho, Laleia, Dare, Iliomar, Lolotoe no agora daudaun iha Bobonaru.
Notísia relevante: Sarani Molop simu Krús Joven ho serimónia kulturál
Jornalista : Alexandra da Costa
Editora : Rita Almeida
