BOBONARU, 23 Abríl 2025 (TATOLI)—Sarani sira iha suku Molop, kuarta 23 Abrí 2025) ne’e, iha tuku 13h30, entuziasmu hamriik lolo-liman, hananu hodi simu prezensa ilas Krús Joven ne’ebé entrega husi sarani sira husi suku Lour, postu administrativu Bobonaru, munisípiu Bobonaru.
Ilhas Krus Joven ne’e simu husi Xefe Suku Molop, António de Jesús Maia, akompaña ho nia espoza no lia-na’in sira liuhusi serimónia kulturál hanesan bidu, likurai no dadolin tuir lisan suku Molop nia hodi fó Bem-Vindu ba krús santu ne’ebé sei hela ho sira durante semana rua nia laran.
Sarani suku Molop, Almeiro de Jesús, sente orgullu tanba mehi kle’ur atu hetan vizita husi ilas Krús Joven ne’e ohin sai ona realidade.
Notísia Relevante: Krús Joven hametin fé sarani no fidelidade ba Kristu-Kreda
“Durante tinan barak ona, ita hein ilas Krús Joven ne’ebé durante tinan barak ona ami temi hela de’it, maibé na realidade ohin nia hakat duni mai iha ami nia suku. Ne’eduni ami sente orgullu, atu nune’e ilas Krúss Joven bele hela netik ninia prezensa ruma ba sarani sira,” nia informa ba jornalista sira, iha área Leobalo Anapal.
Durante semana rua nia-laran, nia dehan, sarani sira sei hananu no hawelok ba krús santu ne’e hodi hato’o sira-nia terus no susar hodi husu kbiit bensaun no domin nian ba ema ida-idak nia fuan.
“K arik durante ne’e la fó liman ba malu, entaun iha tempu ne’e bele fó liman ba malu, atu nune’e hadame-malu iha kristu ninia pás,” nia hateten.
Reprezentante sarani sira husi aldeia Anapál, suku Molop, Flaviana Pereira, konsidera prezensa ila Krús Joven ne’e bele hametin no haburas liután sira-nia fé no fidelidade ba Kristu no uma kreda Katólika.
“Nu’udár sarani, ami sente kontente tebe-tebes hanesan sente hela furak ida, tanba ida-ne’e buat kle’ur tebes ona mak ami hakarak la to’o mai. Ohin loron, to’o iha ne’e, ami hotu-hotu kontente tebe-tebes, hanesan buat ida karik iha mundu ne’e buat ida-ne’e mak ita hakarak. Ida, atu haburas liután ita-nia fiar ne’ebé durante ne’e menús karik, nia bele haburas tan. Ida-ne’e hanesan xave boot ida-ne’ebé ita hakarak hasoru iha ohin loron,” nia dehan.
Iha serimónia entrega ne’e, xefe suku Lour, Miguel Gomes Lopes, ho matan-ween lori sarani tomak nia naran hato’o adeus no agradesimentu ba Ilas Krús Joven ne’ebé hela ho sira durante semana rua nia laran.
Biban ne’e Xefe suku Miguel husu ba sarani suku Molop atu responsabiliza no asegura Krús santu ne’e ho didi’ak no ho domin.
“Hanesan ohin dehan, ninia isin-lolon ami simu iha Karabau ho isin kompletu, ohin ami entrega ba suku Molop mós kompletu. Ne’e mak ha’u husu ita hotu atu kuida to’o entrega ba suku seluk,” nia dehan.
Biban ne’e, Pároku Igreja María Imaculada da Conseição postu administrativu Bobonaru, Munisípiu Bobonaru, Pe. Ernesto Barreto, esplika katak ba ema Judeu sira krús ne’e buat folin laek ida no ba Grego sira buat beik ida. Maibé, ba ema sarani Krús mak dalan Santidade, dalan salvasaun no dalan domin Maromak nian loloos.
“Ita buka atu lori mensajen kmanek ida-ne’e, krus la’ós fatin atu kastigu, krús la’ós fatin atu sakrifisíu maibé krús mak dalan libertasaun, dalan salvasaun, dalan domin Maromak nian mai ita ema iha mundu ne’e. Ita loro-loron sei hatetu-krús no ita loro-loron krús ida ne’e iha ita-nia morís no habelar krús nia grasa ba ema hotu-hotu,” nia dehan.
Tuir oráriu ne’ebé sai husi suku Molop katak Krús Joven sei vizita ba suku Sibuni, Ai-Asa, Leber, Tapo, Oe-leu, Malilait no termina iha suku Bobonaru villa hodi entrega ba Parokia Remexio, Dioseze Dili ninian.
Notísia Relevante : Pe. Ernesto husu sarani postu Bobonaro prepara aan simu Krús Joven
Jornalista : Sergio da Cruz
Editór : Cancio Ximenes
