ERMERA, 05 maiu 2023 (TATOLI) – Sarani sira iha aldeia Hatudmei suku Catrai-Craik, entrega hikas illas Krús Joven ba sarani sira iha suku Lauana, Postu administrativu Letefoho, Munisípiu Ermera, hafoin tempu naruk.
Reprezentante sarani no Xefe suku Catrai-Craik, Carlos da Conceição Soares, hateten, maske illas Krús Joven la horik ona ho sira maibé ho prezensa loron balun ho sira bele hametin liutan sira-nia fiar no fidelidade ba Kristu iha moris lorloron.
“Ohin ami entrega hikas ba sarani sira iha suku Lauana liliu iha aldeia Leubasa, Alosai, Hatugeo no Liabe ne’ebé pertense ba bairu I, maske Krús Joven hakat ona husi ami leet maibé nia espíritu sei horik ho ami ba nafatin no halo ami hametin liutan fiar ba kristu iha moris lorloron nian,” reprezentante sarani hanesan mós xefe suku Catrai-Craik informa.
Hafoin entrega, Lia-na’in suku Lauana aprezenta dadolin tuir lisan, tradisaun no kultura rai ne’e nian hodi fó bemvindu ba illas Krús Joven ne’ebé sira hein tinan barak ba dahuluk vizita iha sira nia knua.
Simu tiha kontinua kedas ho prosisaun ho distansia kilometru ida liu hodi to’o ba fatin ne’ebé prepara ona iha bairru I Leubasa suku Lauana illas Kruz horik ba, no kontinua kedas ho misa eukaristia ne’ebé prezidi husi Amu selebrante, Pe. Cirilo dos Santos.
Hakribi violénsia, kria pás
Iha ómilia padre Cirilo husu ba sarani sira liu-liu joven sira atu hametin fiar liuhusi vizita illas Krús Joven nian, nune’e hakribi violénsia halakon ódiu no vingansa maibé kria pás no domin iha komunidade nia le’et.
“Tinan ida ne’e ita iha grasa boot tanba Na’i Krús Santa horik ho ita sarani Letefoho. Tanba ne’e, husu joven sira atu labele hamosu violénsia hanesan oho malu, baku malu, asalta malu, maibé hakribi violénsia, respeita aman-inan no Na’i ulun sira, aproveita ho illas Krús Joven nia prezensa imi joven sira hakbesik aan hasae orasaun hodi husu hakmatek nune’e bele kria dame, domin iha ida-idak nia aan iha komunidade no sosiedade,” Padre selebrante, Cirilo dos Santos hateten, iha ámbitu selebrasaun vizita Krús Joven iha sarani Bairu I leubasa suku Lauana postu administrativu Letefoho Munisipiu Ermera, foin lalais ne’e.
Iha ámbitu kampaña eleitorál ne’ebé la’o daudaun amu selebrante ne’e mós apela ba joven sira atu respeita malu no respeita lideransa sira liu-liu lider antigu sira ne’ebe luta ba transforma Timor-Leste hanesan nasaun demokrátiku ida.
“Imi tenke hatene tau imi-nia aan, labele husik imi-nia aan sai intrumentu ba polítiku na’in hodi trata no insulta maluk sira seluk, buka respeita malu no konsidera malu hanesan maun no alin. Husu mós ba imi joven sira labele trata lideransa antigu sira hanesan Xanana Gusmão, Mari Alkatiri, Taur Matan Ruak, Lú Olo no lideransa seluktan maibé hatudu respeita no konsiderasaun ba líder hotu iha país ida ne’e”.
Ba joven hirak ne’ebé envolve aan iha arte marsiál no rituál sira, amu selebrante husu atu hadomi malu labele uza kór hodi haketak malu maibé hametin unidade, moris iha dame no domin haree malu hanesan maun-alin nune’e bele kria pás no estabilidade.
Entertantu, illas Krús Joven sei vizita sarani bairru 1 kompostu husi aldeia Leubasa, Alosai, Hatugeo no Liabe durante loron 20 hahú husi loron 2 to loron 22 fulan maiu ne’e no sei kontinua fila fali ba vizita sarani sira pertense ba suku Catrai-Leten.
Tuir oráriu Krús Joven sei prezente tinan ida iha Parókia Na’in Feto do Carmo iha Letefoho hahú husi loron 28 agostu 2022 to’o loron 13 fulan setembru no iha loron 14 setembru sarani Parókia Na’in Feto do Carmo Letefoho sei entrega fila fali ba sarani Parókia Nossa senhora do Rosário, Laleia, Dioseze Baucau nian.
Iha Parókia Na’in Feto Fátima Lolotoe iha fulan agustu tinan 2022 liubá, liuhusi komisaun organizadora Parókia Na’in Feto do Carmo Letefoho organiza atividade vizita lori illas Krús Joven tama sai sarani sira-nia le’et iha komunidade 18 aldeia 67 pertense ba suku 8 iha postu administrativu Letefoho munisipiu Ermera nian.
Notísia relevante:Sarani Iliomar Entrega Krús Joven ba Lolotoe
Husi sarani aldeia 67 ne’e tama ba fulan maiu 2023 illas Krús Joven vizita ona aldeia 48 no tuir órariu to’o fulan setembru 2023 sei vizita hotu sarani sira iha aldeia 67 iha Letefoho.
Ho fé no devosaun ne’ebé metin halo sarani Letefoho entuziasmu lori illas Krús Joven husi aldeia ida ba aldeia seluk, knua ida ba knua seluk, tuun no sa’e foho, hakur mota maske situasaun klima ne’ebé udan no dalan ne’ebé kois no nakunu ho fatuk, tahu maibé sarani sira kontinua hasa’e orasaun, hananu haksolok lori illas Krús Joven vizita fatin hotu iha parókia Letefoho nian.
Istória-badak Krús Joven
Tuir Livru ho títulu “Cruz Jovem”, autór husi Padre Rolando Fernandes, SDB, ne’ebé públika iha pájina ofisiál Santuário Nacional de Maria Auxiliadora Fatumaca – https://www.facebook.com/profile.php?id=100064567193601, katak Kongresu diosezanu foinsa’e sira nian selebra tinan tinan. Iha loron 16 to’o 18 fulan abril tinan 1993, kongresu ne’e selebra iha parókia Santo Antonio iha Baucau. Iha tinan ne’ebá, ba loron tolu, kongresista sira husi parokia sira hotu Timor-Leste nian halibur hamutuk iha SMAK Teulale, Pe. Noel Villafuerte, SDB mak enkarregadu diosezanu ba foinsa’e sira.
Nia fó idea ba padre Paroku no diretór SMAK (Pe. Rolando Fernandes,SDB) nian atu halo krús ida ne’ebé sei husu Amo Bispu Carlos Filipe Ximenes Belo, SDB atu fó bensa no saran ba foinsa’e sira, hanesan Santo Padre São João Paulo II halo iha 1984 iha Roma. Badaen sira parókia no eskola nian (Sr. Vitor, Marcelino no Joao Bosco) hamutuk ho mestre José Almeida no Carlos Sarmento no alunu SMAK sira tesi ai kakeu sanak ne’ebé moris iha kampu futeból ninin hodi halo krús.
Iha misa enseramentu kongresu ne’e alunu SMAK sira lori krús ai kakeu ne’e ba Amu Bispu Carlos atu fó bensa. Bensa hotu tiha, Amu Bispu saran krús ba foinsa’e sira Baucau nian. Misa hotu tiha mak foinsa’e Baucau sira saran fali ba foinsa’e sira Maliana nian, tan Kongresu foinsa’e sira sei selebra tinan tuirmai iha Maliana. Tan buat ne’e foun hela, foinsa’e Maliana sira lori ai Krús ba sira nia fatin, ho domin no devosaun, maibé la iha buat ruma espesiál hanesan mosu iha tinan sira ikus ikus nian. Nune’e, tinan tinan, Krús Joven ne’e muda husi parókia ida ba parókia seluk. Iha selebrasaun aniversáriu 500 kristianizasaun Timór nian, Krús Joven hale’u Timór tomak hodi fó okaziaun ba sarani sira iha parókia hotu atu fó agradese ba Maromak, no hametin liutan sira-nia fiar no fidelidade ba Kristu no nia Kreda.
Buat furak barak mosu iha Krús Joven ne’e nia peregrinasaun. Iha fatin hotu, foinsa’e sira, no mós sarani barak halo velada orasaun nian. Iha parókia barak, vizita Krús Joven sai okaziaun atu lori sarani sira ba sakramentu sira: Eukaristia, konfesa, barlakeadu barak simu sakramentu kazamentu nian, foinsa’e sira simu krisma, labarik sira simu Primeira Komuniaun. No mós, ema sira ne’ebé kle’ur ona la ko’alia ba malu tan hirus malu, hadame malu fali. Krús Joven mós sai okaziaun atu halo katekeze maka’as liutan. Seidauk iha dokumentasaun loloos, maibé bele hanoin katak Krús Joven lori mós foinsa’e balun atu desidi saran aan ba Kristu nu’udar amu-lulik, madre ka irmaun relijiozu. Foinsa’e balun mós hakribi sira-nia moris aat hodi fila fali ba Maromak. Balun tan ne’ebé uluk la ativu ba Kreda, hakbesik aan ba parókia hodi tuir atividade Kreda nian.
Notísia relevante:Krús Joven Afirma Joven Timor Nia Fiar
Jornalista :Anito Soares
Editór : Rafael Ximenes de A. Belo
