ILIOMAR, 25 agostu 2019 (TATOLI)-Sarani katólika husi Parókia Nossa Señora de Fátima Lolotoe, foin lalais ne’e, simu Krús Joven husi Sarani Parókia Iliomar iha Iliomar, Munisípiu Lautem, hodi lori ba sira Lolotoe, Munisípiu Ermera, hodi afirma fali joven nia fiar no domin iha Kristu liuhusi sinál ai-krús.
Notísia Relevante : Sarani Iliomar Entrega Krús Joven ba Lolotoe
Padre Pároku Nossa Señora de Fátima Lolotoe, Pe. Augosto Campus iha nia diskursu hateten, sarani no juventude Parókia Nossa Señora de Fátima Lolotoe simu Krús Joven no husu Timoroan hotu nia orasaun atu Krús ne’e bele lori to’o Lolotoe ho di’ak.
“Fiar ne’ebé mak fó ba ami liuliu Bispu Dioseze Maliana, Mgr. Norberto do Amaral, ne’ebé mak entrega Krús Joven ida ne’e mai ami sarani Parókia Nossa Señora de Fátima Lolotoe, sai uma na’in ba eventu boot juventude nian, tinan ida ne’e no tinan oin mai iha ami-nia parókia,” dehan Amu Pároku Lolotoe.
“Ami husu ita-boot sira-nia harohan no orasaun mai ami atu ami lori Krús ida ne’e la’o ho di’ak no to’o iha povu nia moris hodi hametin liu tan sira-nia fiar tuir ami-nia tema sentrál iha ami-nia eventu ne’e, Krús mak sinál domin no moris, Atu sarani sira hodi bele hateke ba Nai Maromak nu’udar domin Na’in no moris nian,” Amu Augosto Campos haklaken liu tan.
Iha oportunidade ne’e Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, iha nia diskursu hateten, Krús Joven mai iha 2018, foin mak despede iha fulan Agostu 2019 no joven sira mai harii iha fatuk leten hanesan Jesus hateten nune’e “Ha’u sei harii Ha’u-nia Palásiu iha fatuk leten hanesan mós Krús joven mai iha rai Iliomar nia leten”.
“Funu hotu ona maibé joven kontinua halo krime no oho malu, baku malu, tuda malu, maibé prezensa Krús Joven nian hodi halibur no hadame ita iha ida-idak nia moris no lori ksolok domin mai ita liuliu joven sira agora nian,” hateten Majór Lere Anan Timur.
Iha misa enserramentu Jornada Nasionál Juventude Timor Leste (JNJTL), Majór Jenerál Lere husu ba juventude sira katak Krús Joven la’ós mosu iha era independénsia, maibé mosu iha situasaun ida ne’ebé mak difisil no mosu iha tempu ne’ebé mak povu lori Krús todan boot ida no sakrifísiu matan-been hodi fakar raan no soe isin.
“Objetivu ne’ebá ita bele dehan objetivu polítiku hakarak halibur joven hotu-hotu anima nasionál atu hamutuk hateke ba oin hodi bele hetan ninia ukun rasik aan, ohin loron ita bele hetan ukun rasik aan, tan ne’e ita agradese ba igreja Katólika ninia kontribuisaun no partisipasaun ba ita-nia funu libertasaun nasionál,” afirma Lere Anan Timur.
Majór Jenerál Lere Anan Timur hatutan katak ohin loron Krús Joven nia misaun halibur joven sira hotu hanesan mós igreja katólika halibur povu hotu, hanorin dame no domin, atu dezenvolve nasaun TL no ba progresu dezenvolvimentu nia laran.
“Maske Krús Joven husik ita maibé ninia lalatak, espíritu no klamar nafatin ho ita,” hateten Lere Anan Timur.
Iha fatin hanesan, prezidente Konferénsia Episcopal Timorense (CET-sigla portugés) atuál Bispu Dioseze Maliana, Mgr. Norberto do Amaral iha nia diskursu hateten, liu husi prezensa Krús Joven nian sarani hotu hamamuk-aan no hakonu fali espíritu domin no dame.
“Hamamuk aan husi buat ne’ebé mak ladi’ak hanesan hahalok aat soe bebe no oho malu, hakonu fali buat di’ak no halo tuir Nai Maromak Nia ukun fuan ne’ebé mak konsagra ona,” hateten Dom Norberto.
Jornalista : Osória Marques
Editór : Francisco Simões
