BOBONARO, 03 outubru 2024 (TATOLI)-Paroku Igreja Nossa Senhora Imaculada da Conceição postu administrativu Bobonaro, Munisípiu Bobonaro, Padre Ernesto Barreto, husu ba sarani suku 18 atu prepara aan simu prezensa illas Krús Joven ne’ebé tuir oráriu sei vizita postu Bobonaro fulan-novembru 2024.
Amu Pároku ne’e afirma, tuir programa ne’ebé iha Krús Joven sei sai husi Parókia Laleia Manatuto iha loron 08 no sei to’o Parókia Bobonaro entre loron 09 no 10.
Notísia relevante:Krús Joven hametin fé sarani no fidelidade ba Kristu-Kreda
“Ha’u husu ba sarani sira iha suku 18 hakarak ka lakohi tenke bo’ok aan tanba fulan-novembru ita simu ona Krús Joven mai ona ita-nia Parókia. Entaun, imi tenke prepara kondisaun, establese imi-nia Uma-Laku ho medida 8×6 hodi hatudu imi-nia identidade suku nia, no iha biban ne’e mak Krús, símbolu Krús ida atu rai permanenti ba imi,” nia hato’o asuntu ne’e iha sede suku Oe-leu, foin lalais ne’e.
Bibi-Atan ne’e esklarese bazeia ba programa ne’ebé trasa sarani no Igreja sei simu prezensa Krús Joven ho misa ne’ebé realiza iha Igreja Parókia Nossa Señhora Imaculada da Conceição postu Administrativu Bobonaro, hafoin ne’e sei entrega kedas ba Estasaun Misionáriu Marobo loron to’o fulan-dezembru.
Iha meadu fulan-dezembru lori fali Krús Joven ba suku Lourba kontinua ba suku Tebabui sa’e ba Mali-Ubu,Kolimau,mai fali Kota-Bo’ot,Karabau hotu tia ba fali Lour.
Hafoin sai husi Lour kontinua kedas ba suku Molop ba fali Sibuni, Ai-Asa, Leber, Tapo no Suku Oe-leu entre fulan juñu-jullu 2025.
“Iha suku Oe-leu sei hela semana rua to’o semana tolu, sai husi suku ida-ne’e mak suku Mali-lait, entrega ba Bobonaro no iha fulan-setembru 2025 mak ita entrega Krús Joven ba Parokia Remixio,” Katak Padre Ernesto.
Istória-badak Krús Joven
Tuir Livru ho títulu “Cruz Jovem”, autór husi Padre Rolando Fernandes, SDB, ne’ebé públika iha pájina ofisiál Santuário Nacional de Maria Auxiliadora Fatumaca https://www.facebook.com/profile.php? id=100064567193601, katak Kongresu diosezanu foinsa’e sira-nian selebra tinan-tinan.
Iha loron 16 to’o 18 fulan abríl tinan 1993, kongresu ne’e selebra iha parókia Santo António iha Baucau. Iha tinan ne’ebá, ba loron tolu, kongresista sira husi parókia sira hotu Timor- Leste nian halibur hamutuk iha SMAK Teulale, Pe. Villafuerte, SDB mak enkarregadu diosezanu ba foinsa’e sira.
Nia fó idea ba padre Paroku no diretór SMAK (Pe. Rolando Fernandes, SDB) nian atu halo krús ida ne’ebé sei husu Amo Bispu Carlos Filipe Ximenes Belo, SDB atu fó bensa no saran ba foinsa’e sira, hanesan Santo Padre São João Paulo II halo iha 1984 iha Roma. Badaen sira parókia no eskola nian (Sr. Vitor, Marcelino no Joao Bosco) hamutuk ho mestre José Almeida no Carlos Sarmento no alunu SMAK sira tesi ai kakeu sanak ne’ebé moris iha kampu futeból ninin hodi halo krús.
Iha misa enserramentu kongresu ne’e alunu SMAK sira lori krús ai kakeu ne’e ba Amu Bispu Carlos atu fó bensa.
Bensa hotu tiha, Amu Bispu saran krús ba foinsa’e sira Baucau nian. Misa hotu tiha mak foinsa’e Baucau sira saran fali ba foinsa’e sira Maliana nian, tan Kongresu foinsa’e sira sei selebra tinan tuirmai iha Maliana. Tan buat ne’e foun hela, foinsa’e Maliana sira lori ai Krús ba sira nia fatin, ho domin no devosaun, maibé la iha buat ruma espesiál hanesan mosu iha tinan sira ikus nian. Nune’e, tinan-tinan, Krús Joven ne’e muda husi parókia ida ba parókia seluk. Iha selebrasaun aniversáriu 500 kristianizasaun Timór nian, Krús Joven hale’u Timór tomak hodi fó okaziaun ba sarani sira iha parókia hotu atu fó agradese ba Maromak, no hametin liután sira-nia fiar no fidelidade ba Kristu no nia Kreda.
Buat furak barak mosu iha Krús Joven ne’e nia peregrinasaun. Iha fatin hotu, foinsa’e sira, no mós sarani barak halo velada orasaun nian. Iha parókia barak, vizita Krús Joven sai okaziaun atu lori sarani sira ba sakramentu sira: Eukaristia, konfesa, barlakeadu barak simu sakramentu kazamentu nian, foinsa’e sira simu krisma, labarik sira simu Primeira Komuniaun. No mós, ema sira ne’ebé kle’ur ona la ko’alia ba malu tan hirus malu, hadame malu fali.
Krús Joven mós sai okaziaun atu halo katekeze maka’as liutan. Seidauk iha dokumentasaun loloos, maibé bele hanoin katak Krús Joven lori mós foinsa’e balun atu desidi saran aan ba Kristu nu’udar amu-lulik, madre ka irmaun relijiozu. Foinsa’e balun mós hakribi sira- nia moris aat hodi fila fali ba Maromak. Balun tan ne’ebé uluk la ativu ba Kreda, hakbesik aan ba parókia hodi tuir atividade Kreda nian.
Notísia relevante:Sarani Lolotoe “Hawelok no Hana’i” Krús Joven
Jornalista: Sergio da Cruz
Editór: Rafael Ximenes de A. Belo
