Muru protesaun iha mota Nunura hetan danus, presiza intervensaun Governu
BOBONARU, 06 Novembru 2026 (TATOLI) – Xefe Aldeia Manu-Aman, suku Tapo-Memu, postu administrativu Maliana, munisípiu Bobonaru, Marçal Lau Saca, preokupa ho muru protesaun ne’ebé hetan danus kauza husi korente bee-mota ne’ebé maka’as hafoin akontese udan-boot iha fulan hirak liubá, maibé Governu seidauk orienta empreza atu hadi’a.
“Ita la hatane kompañia Marshela mak sei kontinua responsabliza ka kompañia foun mak atu mai hadi’a fali, tanba to’o agora atu besik udan mós seidauk mai hadi’a muru ida tohar ne’e”, nia dehan iha Maliana, kinta-feira ne’e.
Lau Saca rekomenda ba MOP atu foti medida imediata, nune’e bele proteje obra seluk, liuliu ponte Nunura, komunidade nia uma no natar sira.
Rezidente Maliana, Rogério de Araújo, rekomenda ba Ministériu Obra Públika atu halo kontrolu másimu, nune’e obra ne’ebé implementa bele garante nia kualidade.
“Ita haree projetu ne’e mak la kualidade ka oinsá? Bee tebe dala-ida de’it tohar liu ne’e, sá tan bee husi kotuk mak kona. Maibé, ami fiar katak tékniku sira bele rezolve, para halo karik metin kedas ne’e”, nia espera.
Koordenadór Infraestrurura Ministériu Obra Públika, munisípiu Bobonaru, Fernando de Fátima, relata katak Governu sei halo intervensaun, maibé la sita data fiksu.
“Ida-ne’e sei tau hela orsamentu, sei la husik. Kalma uitoan tanba buat sira ne’e prosesu hotu, atu ajusta fali, atu kontinua fali mós ita sei hare didi’ak, ne’ebé ita sei responde”, nia dehan.
Obra ne’e implementa iha tinan 2024 husi empreza Marshela Unip., Lda., ho valór orsamentu $330.862,73.
Daudaun ne’e, Governu kontrata tan kompañia Zencya no Marshela hodi implementa projetu konstrusaun muru protesaun iha mota Nunura ho distánsia kilómetru ida-resin.
Notísia relevante: Korrente bee-mota sobu muru protesaun ponte Nunura
Jornalista: Sergio da Cruz
Editora: Maria Auxiliadora
