Korrente bee-mota sobu muru protesaun ponte Nunura

BOBONARU, 04 Marsu 2026 (TATOLI)-Korrente bee husi mota Malibaka, suku Tapo-Memo, postu administrativu Maliana, munisípiu Bobonaru, no bee-mota husi nasaun viziña Indonézia sobu muru protesaun ponte Nunura.

Muru protesaun ne’ebé hetan estragus kuaze metru 50, ne’ebé konstrui iha tinan 2024 husi kompañia lokál Marshela Unipessoal Lda., ho kustu kontratu $330.862,73 no obra ne’e foin konklui iha tinan kotuk.

Xefe aldeia Manu-mana, suku Tapo-Memo, Marçal Lau Saka Noronha, preokupa tanba obra ne’e laiha kualidade no atu segura ponte Nunura, nia rekomenda ba Governu hadi’ak hikas muru ne’ebé hetan danus.

“Karik udan maka’as nafatin muru ne’e tenke monu tanba okos laiha tiha ona, depois husi ponte nia ne’e metru 100 hanesan retak tiha, ita haree komesa halis ona”, nia informa ohin.

Nia sujere mós atu kontinua konstrui muru protesaun tutan to’o leten hodi bele sátan presaun bee. “Se orsamentu iha, ba oi ,muru protesaun ne’e halo husi ponte ne’e to’o Ilaun leten para nia impaktu bee atu tama mai ne’e laiha ona. Ha’u mós husu ba enjeñeiru sira karik atu halo obra ruma tenke mai halo uluk estudu ba rai”, nia dehan.

Komunidade iha aldeia Manu-mana, João Tavares, reforsa katak aleinde fó danus ba muru protesaun, dezastre naturál ne’e afeta mós natar ektare lubun ida.

“Ita atu fó sala ba sé? Tanba natureza mak hanesan ne’e, nia mai ita atu hapara mós la di’ak, bee ne’e tama husi leten mai estraga ami-nia natar, sorte ami la halo natar iha tempu udan, se la’e estraga hotu”, katak.

Ba kestaun ne’e, Koordenadór Infraestrutura Ministériu Obra Públika destakadu Munisípiu Bobonaru, Fernando de Fátima, klarifika katak muru protesaun monu tanba la aguenta ho presaun bee.

Nia dehan Governu sei buka meiu atu hadi’ak filafali muru ne’ebé hetan danus. “Bee mota ne’e mai husi ita-nia no parte Indonézia nian. Entaun, nia korrente ne’e halai liu mai iha konstrusaun ita halo iha áre ponte nia ne’e mak akontese penahan ne’e tohar tiha. Ita sei iha responsabilidade nafatin ba obra ne’e husi Governu no kompañia mós sei iha hela faze retensaun oinsá mak atu atende estragu ida-ne’e”, nia adianta.

Fernando informa katak ekipa téknika MOP husi nasionál no destakadu munsípiu Bobonaru halo ona levantamentu dadus iha terrenu atu kontinua konstrui muru protesaun ho distánsia metru 500.

Iha tinan 2024 Governu konstrui ona muru protesaun ponte Nunura ho totál pakote tolu ho nia dezeñu sa’e metru 5,30 no nia naruk metru 600-resin, ne’ebé responsabiliza husi kompañia tolu hanesan Marshela Unipessoal Lda., ho kustu $330.862,73, Maliana Brother $304.789,31 no Zhencia ho kustu rihun $300-resin.

Husi totál pakote tolu ne’e,  empreza Maliana Brother no Marshela finaliza ona obra no entrega ona ba Governu, enkuantu parte Zhencia nia seidauk no daudaun pardu hela.

Notísia relevante: Komunidade lamenta ho projetu konstrusaun muru ponte Nunura ne’ebé la’o atraza

Jornalista: Sergio da Cruz

Editora: Maria Auxiliadora