BOBONARU, 23 Setembru 2025 (TATOLI)-Líder komunitáriu no komunidade iha aldeia Manu-Aman, suku Tapo-Memu, postu administrativu Maliana, munisípiu Bobonaru, preokupa ho implementasaun projetu konstrusaun muru protesaun ba estrutura ponte Nunura, tanba la’o tarde liu.
Obra ne’e ho distánsia metru 620 ne’ebé responsabliza husi empreza tolu hanesan Marshela Unip Lda, Maliana Brother Unip Lda no Zhenscia Unipa Lda. Kada kompañia responsabliza metru 220 no daudaun ne’e Maliana Brother Unip Lda mak konsege finaliza ona, falta empreza rua nian.
Xefe aldeia Manu-Aman, Marçal Lau Saca, husu ba Ministériu Obra Publika atu halo kontrolu másimu no orienta empreza rua atu aselera serbisu, tanba obra ne’e implementa kuaze atu tama ona ba tinan rua.
“Ita haree ba projetu ne’e la’o hakdasak. Nia durasaun kontratu hotu ona, maibé ita-nia parte Obra Públika estende tan tempu to’o Dezembru. Hanesan autoridade lokál husu ba kompañia antes Dezembru ne’e halo remata ba”, nia dehan ba jornalista sira, ohin.
Diretór empreza Zencia Unip Lda, Luís Mau-Soco Caero, rekoñese obra ne’e la’o atraza tanba kestaun klima no problema seluk mak mákina avaria.
“Durante ne’e serbisu la’o normál hela, soke ami nia micxer mak aat, más mekániku iha ona dalan mai para sobu lori bá Dili troka tiha. Agora, ha’u aluga fali Risky nia mai para cór fali no atinje ona 30% liu. Aemana ida ami cór tan ne’e pertajen sa’e, tanba ami hetan estensaun to’o Dezembru ne’e bele hotu”, Luís Caero garante.
Aleinde ne’e, Diretora empreza Marshela Unip Lda, Santina Cade Mau Mafalda, garante sei finaliza obra ne’e tuir tempu estensaun, tanba dadaun ne’e tama ona faze finalizasaun.
“Ita-boot sira hare agora 92%, hela de’it pursetyu ualu para ramata. Agora daudaun serbisu la’o hela, ida ne’ebé foin daudaun ita-nia laloran mota baku monu ne’e mós ami komesa hadi’ak fali ona. Ha’u fira katak fulan-Outubru ramata ne’e progresu serbisu mós remata”, nia asegura.
Projetu ne’ebé responsabliza husi empreza tolu ne’e, Marshela Unip Lda ho kustu $330.862,73, Maliana Brother Unip Lda $304.789,31 no Zhencia Unip Lda rihun $300-resin.
Notisía relevante: MOP sei normaliza ponte Nunura
Jornalista: Sergio da Cruz
Editora: Maria Auxiliadora
