iklan

BOBONARO, POLÍTIKA

MOP sei normaliza ponte Nunura

MOP sei normaliza ponte Nunura

Kondisaun atuál estrutura ponte Nunura ne'ebé hetan ameasa hosi korrente mota hafoin akontese udan-boot tersa (09/01) ne'e. Imajen Tatoli/Sérgio da Cruz.

DILI, 21 marsu 2024 (TATOLI)—Ministru Obra Públika (MOP), Samuel Marçal, hateten tempu badak sei normaliza ponte Nunura ne’ebé lokaliza iha suku Tapo-Memo, postu administrativu Maliana, munisípiu Bobonaro.

Notísia Relevante: Komunidade ezije MOP proteje lalais estrutura ponte Nunura

‘’Ponte Nunura hanoin iha semana oin halo uluk protesaun,” Ministru Samuel Marçal hateten ba jornalista sira iha Parlamentu Nasionál (PN), kinta ne’e.

Kondisaun atuál estrutura ponte Nunura ne’ebé hetan ameasa hosi korrente mota hafoin akontese udan-boot tersa (09/01) ne’e. Imajen Tatoli/Sérgio da Cruz.

Nia dehan, MOP rejista ona ponte Nunura, Leomea, aleinde ponte barak kotu hanesan Natarbora ho seluk tan, ba ponte ne’ebé boot agora prepara hela dokumentu iha tempu badak sei lansa prosesu konkursu públiku, balun atende ho emerjénsia uza bronjong halo daudaun hela.

Nune’e, nia dehan, ponte Nunura nian iha tempu badak halo uluk ninia protesaun.

Governante ne’e mós ba to’o Viqueque, Covalima-Suai, Natarbora haree estrada barak mak kotu ne’ebé balun atende daudaun, balun presiza halo dezeñu, estudu didi’ak tau orsamentu hodi halo konstrusaun.

Nia la esplika detallu ponte no estrada hira mak kotu impaktu hosi dezastre natural.

Notísia Relevante: AMB sei submete proposta ba MOP reablita barrajen ponte Nunura

Antes ne’e, komunidade suku Tapo-Memo, postu administrativu Maliana, munisípiu Bobonaro, ezije MOP atu implementa obra ruma hodi proteje lalais ponte Nunura, tanba ponte ne’e úniku sa tohar movimentu Maliana no suku hira labele liu ba-mai Dili.

Kestaun ponte Nunura, Deputadu sira iha Parlamentu Nasionál iha reuniaun plenária sempre levanta hodi husu MOP atu tau atensaun hodi normaliza.

Notísia Relevante: Reprezentante povu husu Governu tau atensaun ba ponte Nunura

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!