BOBONARO, 25 janeiru 2023 (TATOLI) – Autoridade munisípiu Bobonaro (AMB) ne’e planeia sei submete proposta ba Ministériu Obra Públika (MOP) atu reablita barrajen ponte Nunura, iha aldeia Manu-Aman, suku Tapo-Memo, postu administrativu Maliana.
Barrajen ponte Nunura ne’e hetan estragu hosi korrente bee-mota Malibaca no parte Indonézia hafoin akontese udan boot iha semana hirak liubá.
Sekretáriu Autoridade Munisípiu Bobonaro, João de Fátima do Carmo, haktuir hafoin akontesimentu iha semana tolu ba kotuk fulan ne’e Servisu Obra Públika munisipál submete kedas ba proposta ba Diresaun Nasionál Estrada, Ponte no Kontrolu Seias (DNEPCC, sigla portugés) maibé to’o agora seidauk hetan resposta.
Nia dehan, Governu Sentrál delega kompetensia mai autoridade Munisípál liuhosi Servisu Obra Públika só bele halo monitorizasaun no fiskalizasaun ba projetu estrada rurál sira, nune’e problema sira kona-bá reablitasaun ligadu ho valór orsamentu boot liu ne’e kompeténsia nasionál nian.
Notísia relevante: Korrente bee-mota iha fronteira TL-Indonezia sobu barrajen ponte Nunura
“Ita orsamentu natoon de’it, atu halo manutesaun kiik ba estrada hodi fasilita movimentasaun de’it, tanba ne’e mak ami autoridade munisípiu sei koordena fali ho diresaun Obra Públika atu muda tiha ita-nia proposta ne’e direita ba iha Ministru Obra Públika tanba ita haree ninia estragu ne’e boot,” nia informa ba jornalista sira iha Maliana, kuarta ne’e.
Nia rekomenda, barrajen hirak-ne’e foin mak sai ameasa ba korente mota, tanba nasaun viziñu Indonézia konstrui sira-nia barrajen iha liña fronteira ho nia forsa ne’ebé makaas no metin,entaun bainhira akontese udan-boot volume bee hosi nasaun rua ne,’e tama hotu dala ida tebe maka’as nune’e afeta mai barrajen Timor-Leste nian.
Nia fudamenta, hosi kauza hirak-ne’e, tuir levantamentu dadus ne’ebé tékniku servisu obra públika identifika katak daudaun ne’e bee fura ai-rin naruk ponte Nunura ne’ebé hakohi ba rai-okos hahú mosu ona.
“Ita haree bainhira udan-boot mai ponte ne’e bele monu, tanba ninia tian panjang komesa sa’e ona, entaun ho situasaun sira hanesan ne’e ita hakarak normaliza lai mota ne’e,” nia katak.
Tuir dadus, barrajen ne’ebé governu Timor-Leste instala tinan hirak liubá iha arreadór ponte Nunura to’o ba liña fronteira ho Indonézia kuaze metru 800 mak hetan estragu.
Notísia relevante: Tinan ne’e, MOP kontinua prioritiza reabilitasaun estrada no ponte
Jornalista : Sérgio da Cruz
Editór : Evaristo Soares Martins
