iklan

EKONOMIA, BOBONARO, HEADLINE, MUNISÍPIU

Komunidade ezije MOP proteje lalais estrutura ponte Nunura

Komunidade ezije MOP proteje lalais estrutura ponte Nunura

Kondisaun estrutura ponte Nunura, lokaliza iha aldeia Manu-Aman, suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.

MALIANA, 12 abríl 2023 (TATOLI) – Komunidade sira kontinua ezije ba Ministériu Obra Públika (MOP) atu implementa obra ruma hodi proteje lalais estrutura ponte Nunura, ne’ebé lokaliza iha suku Tapo-Memo, postu administrativu Maliana, munisípiu Bobonaro.

Abitante Maliana, Calisto Soares de Deus, haktuir foin lalais Ministru Obra Públika hamutuk ho ekipa, mai haree rasik kondisaun ponte ne’e ho matan, no promete atu halo reabilitasaun, maibé to’o agora seidauk implementa obra ruma.

Notísia relevante: PN husu Governu halo intervensaun lalais ba ponte Nunura-Loes

“Ida-ne’e mak ami povu sente ladún di’ak, ne’ebé ami husu ba na’in ulun sira iha leten, favór tau matan lalais ba ponte ne’e, tanba ponte ne’e úniku, sé tohar tiha ema hosi Maliana no suku hira mak labele liu ona ba Dili,” Abitante Calisto Soares de Deus, informa ba Tatoli, hafoin viajen hosi Dili mai Maliana, kuarta ne’e.

Nune’e mós abitante Felisberto Afonso, preokupa tebes ho kondisaun ne’e tanba volume kontinua fó ameasa ba estrutura pontu Nunura, no sobu mós agrikultor sira-nia natar.

“Udan durante ne’e la para loos, ita haree bronjong sira-ne’e foin lalais akontese primeiru ne’e sei di’ak, maibé semana ida nia laran bee lori hotu ona, falta oituan tán natar sira-ne’e bele mout hotu ona,” nia akresenta.

Nia husu ba Governu atu halo intervensaun lalais ba infraestrutura hirak-ne’e, nune’e bele proteje ponte labele monu inklui estraga agrikultór sira-nia produtu.

“Agora ita hamriik iha ponte ninin ne’e, depois karreta boot ida liu mai agora ita sente nakdoko maka’as loos, ne’ebé boot sira tenke tau matan lalais, hodi salva mós natar sira-ne’e, tanba uluk ita liu ba haree matan loos, agora sira la halo tanba be’e tama hotu,” nia katak.

Enkuantu iha tersa loron 07 fulan-fevereiru, Ministru Obra Públika, Abel Pires, hamutuk ho tékniku sira mai identifika no halo levantamentu dadus kona-bá estragu sira iha ponte Nunura, hodi halo normalizasaun, liuliu konstrui moru protesaun inklui halo mós protesaun ba estrutura ponte Nunura.

Tuir dadus hosi tékniku diresaun servisu obra públika munisípiu Bobonaro, identifika barrajen protesaun ne’ebé governu Timor-Leste instala tinan hirak liubá iha arreadór ponte Nunura to’o ba liña fronteira ho Indonézia kuaze metru 800 mak hetan estragu.

Notísia relevante: Autoridade Bobonaro husu MOP aselera reabilitasaun barrajen ponte Nunura

Jornalista   : Sergio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!