Reprezentante povu husu Governu tau atensaun ba ponte Nunura
DILI, 05 fevereiru 2024 (TATOLI)—Reprezentante povu iha uma fukum Parlamentu Nasionál (PN), liuhusi Deputadu FRETILIN, José da Crus, kontinua husu Governu liuhosi ministériu kompetente atu tau atensaun ba ponte Nunura, munisípiu Bobonaro.
Notísia Relevante: Korrente bee-mota iha fronteira TL-Indonezia sobu barrajen ponte Nunura
“Hakarak aprezenta kazu infraestrutura ponte Nunura ameasadu hela, asuntu ne’e foti iha dala-tolu ka dala-haat, nune’e husu Governu atu tau atensaun,” Membru PN ne’e hato’o liuhosi intervensaun iha reuniaun plenária PN, segunda ne’e.
Aleinde ne’e, reprezentante povu iha fukun PN ne’e mós husu atu parte ezekutivu tau atensaun ba estrada Leolima, Bobonaro nian ne’ebé ameasadu atu kotu, nune’e presiza intervensaun urjente tanba agora tempu udan hela.
Iha reuniaun plenária ne’e, Deputadu CNRT Gabriel Soares mós foti preokupasaun relasiona ho situasaun iha postu administrativu Laleia ba Cairui ne’e, iha ponte ida ameasadu atu kotu, nune’e husu ministériu relevante atu tau atensaun.
Vise Ministru ba asuntu Parlamentár, Adérito Hugo da Costa, rejista deputadu sira-nia preokupasaun no sei hateten katak kona-ba asuntu infraestrutura nian ne’ebé Deputadu sira foti iha infraestrutura balun daudaun iha andamentu ona iha tribunal kamára konta atu hetan vistu préviu.
Notísia Relevante: Komunidade ezije MOP proteje lalais estrutura ponte Nunura
Jornalista : Nelson de Sousa
Editór : Cancio Ximenes
