Top

PR Ramos-Horta ho omólogu EAU reafirma amizade no parseria estratéjika, loke dalan foun ba kooperasaun

Prezidente Repúblika, José Ramos Horta, realiza enkontru bilaterál ho Prezidente Emiradu Arabe Unidu (EAU) , Súa Alteza Sheikh Mohamed bin Zayed Al Nahyan, iha Palásiu Prezidensiál Abu Dabhi, Domingu (15/11/2026). Imajen TATOLI/Nelson de Sousa

ABU DHABI, 15 Novembru 2026 (TATOLI)—Prezidente Repúblika (PR), José Ramos-Horta, Domingu ne’e, hala’o enkontru bilaterál ho Prezidente Emiradu Árabe Unidu (EAU), Sua Alteza Sheikh Mohamed bin Zayed Al Nahyan, iha Palásiu Prezidensiál, Abu Dhabi, atu hametin relasaun amizade no parseria estratéjika entre nasaun rua.

Enkontru ne’e hala’o iha ámbitu vizita traballu Prezidente Ramos-Horta ba EAU, ho objetivu atu habelar relasaun diplomátika no hametin kooperasaun bilaterál, liuliu iha área komérsiu, investimentu no dezenvolvimentu estratéjiku.

Ajenda vizita diplomátika ne’e inklui enkontru bilaterál ho Prezidente EAU, halo konsulta iha nivel aas ho Ministra Estadu ba Negósiu Estranjeiru EAU, Noura Al Kaabi, no enkontru ho líder emprezariál no reprezentante entidade relevante sira.

Enkontru bilaterál entre Xefe Estadu rua ne’e fornese plataforma iha nivel aas atu haforsa parseria estratéjika no estabelese ajenda kooperasaun ba futuru. Enkontru ne’e mós hatudu rekoñesimentu EAU ba Timor-Leste nu’udár parseiru importante no kompromisu lideransa rua nian atu promove pás, dezenvolvimentu sustentável no estabilidade rejionál.

Iha sorumutu ne’e, líder rua diskute oportunidade atu haforsa kooperasaun bilaterál iha área ekonomia, komérsiu, investimentu no enerjia renovável, ho objetivu atu suporta kreximentu ekonómiku sustentável no prosperidade duradoura ba nasaun no povu rai rua.

Aleinde ne’e, sira mós ko’alia kona-ba importánsia Konferénsia Peskizaun Bee Nasaun Unida (ONU) 2026, ne’ebé EAU sei sai país organizadór iha Dezembru, hodi promove solusaun inovadór ba dezafiu bee, hadi’a jestaun bee no asegura sustentabilidade rekursu bee.

Líder rua mós subliña importánsia kooperasaun liuhusi Asosiasaun Nasaun Sudeste Aziátiku (ASEAN) nu’udár plataforma ida atu haforsa relasaun bilaterál, konsidera EAU nu’udár parseiru diálogu setoriál ASEAN nian.

Durante enkontru, Prezidente Ramos-Horta hato’o apresiasaun no valoriza amizade entre nasaun rua.

“Hanesan onra boot ida mai iha Abu Dhabi no hasoru Sua Alteza Prezidente Emiradu Árabe Unidu nian. Timor-Leste valoriza tebes ninia amizade ho Emiradu Árabe Unidu, no ha’u hein ba diskusaun sira-ne’ebé sei hametin ita-nia ligasaun bilaterál no loke dalan foun ba kooperasaun entre ita-nia nasaun no povu rai rua.

“Apoiu Abu Dhabi nian sai hanesan instrumentu importante ba ami-nia dezenvolvimentu nasionál iha área importante balun, no ami kontinua komprometida atu hametin amizade ida-ne’e ba benefísiu mútuo husi nasaun rua no povu,” nia esplika.

Prezidente Ramos-Horta nia vizita traballu bá Abu Dhabi subliña relasaun amizade no parseria entre Timor-Leste no EAU, ne’ebé bazeia ba respeitu mútuo no kompromisu komún atu promove pás, prosperidade no fraternidade umana.

Enkontru ne’e akompaña mós husi Embaixadór Timor-Leste ba EAU, Rui Manuel Hanjam; Embaixadór Naun-Rezidente EAU ba Timor-Leste, Abdulla Salem Al Dhaheri; Asesór Sénior Prezidente Repúblika ba Asuntu Relasaun Internasionál, Nelson Gaspar Ferreira dos Santos; no membru delegasaun sira seluk.

Kontestu

Relasaun diplomátika entre Timor-Leste no Emiradu Árabe Unidu hahú iha tinan 2009, no kontinua hametin liuhusi vizita ofisiál no enkontru iha nivel aas entre líder nasaun rua. Timor-Leste loke Embaixada iha Abu Dhabi iha Setembru 2024, nu’udár pasu importante ida atu haforsa relasaun diplomátika, komérsiu no investimentu.

Iha 31 Agostu 2026, Ministra Estadu EAU ba Negósiu Estranjeiru, Noura Al Kaabi, mós vizita Timor-Leste no hasoru Prezidente Repúblika, José Ramos-Horta, hodi diskute oportunidade kooperasaun iha área dezenvolvimentu sustentável, edukasaun no investimentu.

Klik notísia relevante sira iha kraik hodi lee:

  1. UAE Ministry of Foreign Affairs – Bilateral Relations between UAE and Timor-Leste. https://www.mofa.gov.ae/en/Missions/Dili/UAE-Relationships/Bilateral-Relations
  2. Emirates News Agency (WAM) – Noura Al Kaabi visits Timor-Leste to advance bilateral cooperation.https://www.wam.ae/en/article/c21lw2j-noura-kaabi-visits-timor-leste-advance-bilateral
  3. Emirates News Agency (WAM) – UAE and Timor-Leste Presidents discuss strengthening bilateral relations. https://www.wam.ae/en/article/c39nyzf-uae-and-timor-leste-presidents-discuss
  4. Presidência da República – President Ramos-Horta Arrives in Abu Dhabi to Expand Strategic Ties with the UAE. https://presidenciarepublica.tl/president-ramos-horta-arrives-in-abu-dhabi-to-expand-strategic-ties-with-the-uae/
  5. TATOLI – Prezidente Repúblika to’o ona iha Abu Dhabi hodi realiza vizita Estadu. https://tatoli.tl/2026/11/12/prezidente-republika-too-ona-iha-abu-dhabi-hodi-realiza-vizita-estadu/
  6. Parlamento Nacional – Plenário dá consentimento prévio à deslocação do PR aos Emirados Árabes Unidos. https://www.parlamento.tl/index.php/noticias/plenario-da-consentimento-previo-a-deslocacao-do-pr-a-republica-da-coreia-belgica-republica-da-turquia-e-emirados-arabes-unidos

Jornalista: Nelson de Sousa

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!