HAKIDUK UITOAN

(KUADRA (POEZIA LIÑA-HAAT) HITU[1])

Autór: Yohanes Manhitu[2]

…………………………………………

HAKIDUK UITOAN

Hakiduk uitoan la’ós tan la folin,

maibé atu hanoin hetok kle’an.

Hafoin, ita hakat filafali ba oin

ho kbiit no biban boot liután.

Yogyakarta, 26-09-2015

ITA SEI HANOIN HIKAS

Loron ruma, ita sei hanoin hikas
hakat sira-ne’ebé ita foti tiha ona.
Maski hosi hun, ita nunka soi liras,
kalohan iha lalehan, ita bele kona.

Yogyakarta, 11-04-2016

DALA RUMA ITA BURAS

Dala ruma ita buras, maibé buras mesak.
Ita nunka hanoin atu haburas ema seluk.
Iha tempu ida-be halo ita hanoin an resik,
tau matan ba ema seluk, ne’e buat murak.

Yogyakarta, 30-07-2016

SE Ó TRISTE TAN HORISEHIK

Se loron naruk ó triste tan horisehik,
ó sei haluha atu goza loron ohin.
Keta husik susar atu ukun resik
no tau abuabu iha ó-nia oin.

Yogyakarta, 09-11-2016

KETA HALEUR

Dala ruma ó bele de’it sente baruk,
no iha laran, sentimentu mamuk.
Keta haleur to’o tempu naruk
se ó lakohi moris sai moruk.

Yogyakarta, 12-11-2016

ITA SEI OIN-SOLOK

Iha loron ne’ebé ita hotu-hotu hein,
laran tomak sei nakonu ho ksolok.
Só Na’i Maromak ita-nia mahein.
Nafatin ho Nia, ita sei oin-solok.

Yogyakarta, 13-11-2016

LUTA NAFATIN ATUBELE MANÁN

Hanesan manu bá buka hahán,
ó luta nafatin atubele manán.
Iha tempu loron ka iha kalan,
ó haka’as an atu hetan dalan.

Yogyakarta, 12–02-2018

————————————————————

[1] Tuir definisaun, kuadra (naran seluk: kuartetu) mak estrofe ida-ne’ebé kompostu hosi liña haat, nu’udar parte hosi poezia ida be naruk liu ka nu’udar poezia ida tomak (obra independente). Iha kuadra ida (liuliu bainhira hamriik ketak nu’udar poezia ida), liña sira-ne’e hotu konteúdu. Entaun, nia la hanesan ho pantun (tipu poezia antigu ida-ne’ebé koñesidu tebes iha rejiaun Nusantara), ne’ebé kompostu hosi sampiran (liña introdusaun rua, nu’udar parte dahuluk) no isi (liña konteúdu rua, nu’udar parte daruak).

[2] Yohanes Manhitu ne’e poeta, hakerek-na’in, tradutór no durubasa ne’ebé hadomi lian no literatura. Nia mak hakerek Kamus Indonesia-Tetun, Tetun-Indonesia (Jakarta: PT Gramedia Pustaka Utama, 2007), Kamus Portugis-Indonesia, Indonesia-Portugis (Jakarta: PT Gramedia Pustaka Utama, 2015), A WALK AT NIGHT (Une promenade de nuit): A Collection of English and French Poems (Antuérpia: Eldonejo Libera, 2017), LIRIK SANTALUM: Kumpulan Puisi Dawan dan Tetun dengan Terjemahan Indonesia (Yogyakarta: Diandra Kreatif, 2019) no livru sira seluk (bele hetan informasaun iha ymanhitu-works.blogspot.com). Nia hela iha sidade ki’ik Ungaran (besik Semarang), Java Sentrál, Indonézia.