Haloot ona jornalista Dedé iha Semitériu Bauró-Lospalos

November 15, 2026
10:22 PM
Facebook Instagram X WhatsApp Telegram

*Misa fúnebre jornalista Dedé iha Kapela Santu Calistro Carvalho, iha Sepelata, Suku Bauró, Postu Lospalos, Domingu (15/11/2026). Imajen TATOLI/Natalino Belo*

LAUTEIN, 15 Novembru 2026 (TATOLI)—Haloot ona iha Domingu ne’e jornalista sénior, Gaudêncio Marques Figueiredo, ne’ebé koñesidu ho naran Dedé, ninia mate-isin iha Semitériu Bauró, Postu Administrativu Lospalos, Munisípiu Lautein.

Dedé hakotu nia iis iha Kuarta (11/11/2026), hafoin hetan asidente tráfegu iha área Lanud, Suku Tirilolo, Postu Administrativu Baukau Vila, Munisípiu Baukau. Molok lori bá fatin orijen iha Bauró, ninia mate-isin hatuur kalan ida iha rezidénsia família nian iha Betulale, Tirilolo.

Hafoin to’o iha Bauró, família hala’o serimónia kulturál tuir kostume Lospalos nian no kontinua ho misa fúnebre iha Kapela Santu Calistro Carvalho, Aldeia Sepelata, Suku Bauró, Postu Administrativu Lospalos, antes lori nia mate-isin bá semitériu atu haloot.

Reprezentante família husi Uma-Lisan Chailor, Florindo Miranda, hato’o agradesimentu ba kolega, estudante, jornalista no instituisaun mídia sira-ne’ebé marka prezensa iha serimónia fúnebre, atu fó apoiu no solidariedade ba família iha tempu triste ne’e.

Família hamutuk ho kolega sira kari ai-funan no sunu lilin ba rate jornalista Dedé iha Sepelata, Bauró, Postu Lospalos, Domingu (15/11/2026). Imajen TATOLI/Natalino Belo

“Ha’u husu ita hotu atu reza hamutuk no harohan, atu Dedé nia klamar kontinua hamutuk ho ita no bele hela iha Maromak nia uma,” Florindo Miranda dehan iha Kapela Santu Calistro Carvalho, Sepelata, Bauró.

Nia mós husu ba kolega, indivíduu no instituisaun sira atu kontinua hahalok di’ak no obra ne’ebé Dedé husik hela, liuliu hodi fó apoiu ba família no parente sira.

Aleinde ne’e, família Chailor hato’o deskulpa ba família sira, hanesan fetosá, uma-mane, kolega no instituisaun sira, se durante prosesu fúnebre iha falta ka sala ruma ne’ebé la konsege atende ho di’ak.

Kontestu

Dedé moris iha Bauró, Lospalos, iha loron 23 Juñu 1983. Nia kaben-na’in no iha oan na’in-haat. Durante iha nia moris profisionál, Dedé sai nu’udár jornalista sénior ne’ebé uluk servisu iha média Suara Timor Lorosa’e (STL) no ikusmai hala’o kna’ar nu’udar editór sénior iha Mídia INDEPENDENTE.

Aleinde jornalista, Dedé mós nu’udár dosente iha Departamentu Komunikasaun Sosiál, Fakuldade Siénsia Sosiál, Universidade Nasionál Timor Lorosa’e (UNTL). Nia mós ativista ne’ebé promove liberdade espresaun no liberdade imprensa, no envolve an iha organizasaun profisionál jornalista sira, hanesan Timor-Leste Press Union (TLPU) no Asosiasaun Jornalista Timor-Leste (AJTL).

Klik notísia relevante sira iha kraik hodi lee: