DILI, 26 Agostu 2025 (TATOLI)—Ahi han uma-lisan ida iha Aldeia Lor Kairavela, Suku Vemasse Tasi, Postu Administrativu Vemasse, Munisípiu Baukau.
Inséndiu ne’e akontese iha Tersa ne’e purvolta tuku 11:35 Otl bainhira uma-na’in laiha uma no hala’o hela atividade kulturál iha fatin seluk, iha-ne’ebé derepente ahi alastra ba uma-lisan hodi rezulta sasán-lulik no ekipamentu seluk labele salvadu.
“Tuir informasaun husi uma-na’in katak seidauk hatene loloos kauza husi inséndiu ne’e,” Administradór Postu Administrativu Vemasse, Elda Maria Viegas de Sousa Freitas infroma ba TATOLI liuhosi telefónema.
Elda Freitas relata husi observasaun iha terrenu katak kazu ne’e suspeitadu ba iskeru rebenta ka fiu sirkuitu nune’e sai kauza ba uma-lisan hetan inséndiu.
Nia salienta bainhira akontese autoridade postu halo kedas kontatu ba Autoridade Protesaun Sivíl (APC-sigla portugeza) liuhosi ekipa korpu Bombeiru hodi halo atuasaun, maibé la konsege salva uma ne’e tanba fatin akontesimentu ne’e distánsia dook.
Komunidade ne’ebé besik hamutuk ho funsionáriu postu no suku inisiativa lori bee rega uma-lisan ne’ebé ahi han maibé labele salva tanba menus ekipamentu.
“La rezulta ema kanek maibé sasán-lulik beiala sira-nian hanesan kohe sira labele salvadu,” Elda haktuir.
Entretantu, Autoridade Postu Vemasse fó oreintasaun ba delegasaun Sekretaria Estadu Arte Kultura Munisipál Baukau atu relata informasaun ba nasionál nune’e vítima sira bele hetan apoia.
Iha fatin ketak, Komandante Operasionál Autoridade Protesaun Sivíl Munisípiu Baukau, Francisco Viana Freitas hateten maski ho esforsu tomak maibé parte Bombeiru la konsege salva uma-lisan, más konsege hamate inséndiu referidu hodi labele alastra ba komunidade nia uma.
“Laiha iha ema kanek. Daudaun ne’e sei iha identifikasaun no halo análize antes fó apoiu emerjénsia,” Franscisco hateten.
Daudaun ne’e ekipa APC rejista sasán sira hanesan hare-kulit, tais-feto no mane, ekipamentu koziña, osan no sasán kultura no totál membru família antes distribui apoia emerjénsia.
Jornalista: Natalino Belo
Editór: Xisto Freitas da Piedade
