MOP husu dirijente CCI-TL munisípiu hapara faan tutan projetu ba ema seluk
DILI, 26 Agostu 2025 (TATOLI)—Ministru Obra Públika (MOP), Samuel Marçal, husu ba prezidente Câmara Comérçio Indústria Timor-Leste (CCI-TL) iha kada munisípiu atu iha responsabilidade no hapara aktu ida faan tutan projetu konstrusaun infraestrutura ba ema seluk.
“Ha’u la gosta mak hahalok ida faan projetu ne’e. Hetan oportunidade lakohi uza hodi aprende, buka mak faan tutan no hetan pursentu ba hola kamioneta sira maibé laiha responsabilidade morál ba rai ida-ne’e,” Ministru Obra Públika, Samuel Marçal, informa ba jornalista sira iha Hotel Timor, ohin.
Governu tau setór privadu, nia dehan, setór privadu sira para ona ho broker tanba uitoan ka ki’ikoan buka atu aprende kaer rasik (responsabilidade), atu rezulatdu aat ne’e laiha buat ida maibé koko hodi harii, nune’e Estadu bele kontinua tau laran metin ba sira.
“Se lae, ita sei susar iha loron ida, se imi lahanoin ida-ne’e,” nia dehan.
Prezidente Câmara Comérçio Indústria Timor-Leste, Jorge Manuel de Araújo Serano, mós konkorda ho intensaun husi Ministru Obra Públika nian, tanba dalabarak setór privadu sira balun gosta hatudu liman de’it ba parte Governu maibé mós presiza haree sira ida-idak nia an.
“Ne’e realidade, ita hotu hatene. La’ós hotu-hotu maibé barak liu mak foti oportunidade para faan tutan de’it no hein simu de’it pursentu. Ba ha’u, ne’e la loos, tanba ne’e ita la eduka ema,” nia dehan.
Nia dehan, tanba ita hanoin de’it katak kualker orsamentu Estadu ne’ebé governante sira fó fiar ba setór privadu hodi ajuda dezenvolve Timor-Leste.
Karik hetan projetu ruma, nia husu, atu jere ho di’ak no uza orsamentu ne’e hodi diversifika fali ekonómia no fó empregu ba maluk sira-ne’ebé dezempregu iha rai-laran.
“Informasaun ne’ebé Ministru fó ne’e, signifika katak nia hatene no realidade mak hanesan ne’e. Tanba ne’e, ha’u mós husu ba maluk sira atu para ona ho hahalok faan de’it projetu ba ema seluk, labele obriga karik laiha kapasidade atu jere,” nia hateten.
Reprezentante Vise-Prezidente Câmara Comérçio Indústria Timor-Leste husi munisípiu Vikeke, Gilberto Ribeiro da Costa, hateten loos duni informasaun ne’ebé husi Ministru Obra Públika atualiza ne’e klaru, atu nune’e bainhira hetan projetu ida ba faan fali, maske loloos ne’e responsabilidade ema ida-nian.
“Ha’u hanoin ita tenke hakbiit ita-nia an rasik, koko atu hala’o tuir ita-nia kapasidade. Karik failla ruma mak ita presiza haree ninia solusaun, la’ós ita faan depois ita tuur de’it hodi hein simu osan pursentu nian, ne’e ita la aprende buat ida,” nia hateten.
Tanba ne’e, nia husu atu tenke uza oportunidade ho responsabilidade no satán Governu mós fasilita banku ruma hodi reforsa setor privadu nia fundu atu nune’e bele konstrui projetu infraestrutura ne’ebé mak kualidade no dura to’o tempu naruk.
Jornalista : Alexandra da Costa
Editór : Cancio Ximenes
