DILI, 26 Agostu 2025 (TATOLI)–Serbisu Nasionál Ambulánsia no Emerjénsia Médika (SNAEM) koloka ona profisionál saúde na’in-14 no apoia ambulánsia ualu (8) ba eventu Dili Internasionál Trade Expo (DITE 2025) ne’ebé sei realiza iha 28 Agostu to’o 01 Setembru 2025 iha Sentru Konvensaun Dili (CCD, sigla postugés).
Diretór-Jerál SNAEM, Simplício Amaral, hateten sira koloka ona profisionál saúde na’in-ualu (8) no ambulánsia lima (5) iha Sentru Konvensaun Dili hodi tulun partisipante sira iha Expo Komérsiu Internasionál Dili no ambulansia tolu (3) movel ba hotel sira-ne’e.
“Iha CCD, sira fó mai ami fatin rua (2) hodi koloka ami-nia rekursu médiku na’in-rua (2) no enfermeiru na’in-neen (6), atu tulun partisipante eventu sira inklui ambulansia lima (5),” nia hateten ba Agência TATOLI iha Kaikoli, ohin.
Nia relata, alokasaun ba profisionál saúde na’in-neen (6) no ambulánsia tolu (3) ba otél tolu ne’ebé bainaka sira hela ba.
“Agora daudaun, otél sira-ne’ebé konfirmadu ba akomodasaun ba bainaka sira mak Otél Novo Turismo, JL WORD no Otél Palm Springs,” nia informa.
Nia subliña, koordena hela ho Ospitál Nasionál Guido Valadares (HNGV) atu nune’e kazu grave ruma bele transfere ba ne’ebá.
“Tanba emprezáriu de’it mak partisipa iha eventu ne’e, balun iha istória moras fuan, tanba ne’e ita konsiente kona-ba kondisaun ida-ne’e no ita presiza informa ba HNGV, nune’e sira bele halo tratamentu,” nia esplika.
Nia hatutan, ai-moruk sira agora daudaun disponivel ba eventu sira-ne’ebé sei hala’o husi 28 fulan-Setembru to’o loron 01 fulan-Setembru 2025 Sentru Konvensaun Dili (CCD, sigla postugés).
Jornalista : Felicidade Ximenes
Editór : Cancio Ximenes
