DILI, 27 Agostu 2025 (TATOLI)—Federasaun Futeból Timor-Leste (FFTL) ofisialmente selebra kontratu ho treinadór prinsipál husi Portugál, José Pedro Alves Salazar, durante tinan ida.
Prezidente FFTL, Nilton Gusmão esplika desizaun referida foti tanba oras ne’e ekipa selesaun nasionál laiha treinadór hafoin Simón Pablo Elissetche termina kontratu ho FFTL.
“Treinadór selesaun nasionál foun mak José Pedro hamutuk ho Jaime Coelho nu’udár asistente,” Prezidente FFTL hateten iha ninia kna’ar fatin, Bairros dos Grilos, Kuarta ne’e.
Nilton hateten treinadór José no Jaime sei lidera selesaun nasionál iha kompetisaun sira-ne’ebé partisipa husi Timor-Leste.
Nia esplika serbisu prinsipál ne’ebé sei halo husi treinadór foun mak foku uluk ba kompetisaun Kualifikasaun Ázia ne’ebé sei hela jogu haat hanesan kontra Filipina, Tazaskistaun, Moldova no liuliu bele gaña rezultadu pozitivu hodi utrapasa husi apuramentu.
“Ita iha ona konkordánsia ho treinadór José Pedro no komprimitidu sei fó esperiénsia hotu,” Nilton informa.
Aleinde ne’e, tuir nia, FFTL depozita konfiansa hodi hili treinadór José Pedro liuliu hakarak eleva no adapta métodu jogu Europeu espesialmente Portugál tanba haree ba esperiénsia hanesan eis jogadór ekipa nasionál no ikus sai treinadór iha Portugál.
Notísia relevante: FFTL deside treinadór husi Portugál substitui Simón Elissetche
Treinadór José Pedro sei hahú efetivu iha fulan-Setembru tinan ne’e no sei termina iha Setembru tinan-2026 ne’ebé tuir kláuzula halo estensaun, hatudu prestasaun iha jogu kompetisaun AFC no AFF inklui fó asisténsia iha departamentu tékniku liuliu dezenvolve jogadór juvenil hanesan dezenvolve kurríkulu futeból.
Entretantu, treinadór José Pedro moris iha 18 Outubru 1978, nu’udár eis jogadór koñesidu ho naran Zé Pedro. Nia mós eis jogadór profisionál iha klube sira hanesan Montijo, Barreirense, Boavista no ikus iha klube Alcochetense.
Ninia karreira treinadór iha klube Alcochetense (2014-2016), Belenenses (2018), Sporting CP (2019-2020), Famalição (2021) no AEL Limassol (2022) nu’udár asistente jestór, B-SAD (2023), Vitória Setúbal (2023-2024) no Alverca (2024).
Jornalista: Natalino Belo
Editór: Xisto Freitas da Piedade
