DILI, 27 Agostu 2025 (TATOLI) – Tenente-Jenerál Lere Anan Timur iha kontestu ba selebrasaun Loron Konsulta Populár 30 Agostu ba da-26 (1999-2025) hateten momentu ida-ne’e importante, tanba povu barani deside nasaun nia destinu.
“Ida-ne’e únika oportunidade ba Timor-Leste atu manán ka lakon, maibé rezultadu hatudu pozitivu ba Timor-Leste ukun-an. Ha’u fó parabéns ba povu Timor-Leste, tanba iha loron 30 Agostu 1999 ho aten-barani deside ba ukun rasik-an”, Lere Anan Timur hateten iha Timor Plaza.
Ho rezultadu votasaun ne’e maka agora país ukun-an ona, nune’e joven sira ne’ebé moris iha tempu ukun rasik-an presiza hatene istória. “Sira ne’ebé boot, moris iha funu nia laran maka halo istória no konta istória, liuliu ba joven sira ohin loron. Se uluk inan-aman sira aprende halo funu oho-malu, agora tempu joven sira kria pás no estabilidade ba dezenvolvimentu nasaun nian”, nia apela.
Maibé tuir Lere, hafoin ukun an ona joven sira halo krime. “Ida-ne’e labele fó sala de’it ba joven, maibé Governu mós tenke halo refelsaun tanba saida mak konflitu ne’e kontinua eziste”, nia dehan.
Lembra katak iha loron 30 fulan-Agostu tinan 1999, povu Timor-Leste, ho aten-barani no determinasaun vota iha Konsulta Populár. Hafoin liu tiha tinan 24 husi okupasaun indonézia nian, to’o ikus, timoroan sira espresa momós sira-nia hakarak kona-ba independénsia ba territóriu ne’e.
Notísia relevante: Selebra Loron Konsulta Populár ba da-26, Alkatiri husu reflesaun koletiva
Jornalista: Arminda Fonseca
Editora: Maria Auxiliadora
