MAE aloka $64.000 ba komemorasaun Konsulta Popular ba dala-XXVI iha Dili
DILI, 27 Agostu 2025 (TATOLI)—Governu liuhusi Ministériu Administrasaun Estatál (MAE) prepara osan ho montante $64.000 ba komemorasaun Konsulta Populár ba dala-XXVI (30 Agostu 1999 to’o 30 Agostu 2025).
“Osan naton de’it, ne’ebé ita aloka ona $64.000 hodi halo preparasaun ba komemorasaun Konsulta Populár ne’ebé realiza iha Dili. Osan ne’e hodi sosa materiál ba dada rifa, prepara ba konvite no prodús baner balun,” Sekretáriu Jerál Komisaun Organizadora loron Konsulta Populár, Ângelo Urbano Fernandes, informa ba Ajénsia TATOLI, iha ninia knaar fatin, iha resintu MAE, Kaikoli, Kuarta ne’e.
Atuál Diretór Jerál Servisu Korporativu iha MAE dehan, preparasaun ba komemorasaun ne’e simples.
“Preparasaun ba atividade ne’e ita halo marsa saudável ne’ebé lokalizadu iha pontu rua, ida mak iha Jardín 05 de Maio no Bidau Santa-Ana. Iha fatin rua ne’e ita-nia estudante husi Ensinu Sekundáriu Cristal no Canossa mak sei akompaña ho drumband,” nia akresenta.
Notísia relevante : Selebra Loron Konsulta Populár ba da-26, Alkatiri husu reflesaun koletiva
Marsa saudável iha tuku 14:00 lorokraik husi parte jardín 05 de Maio no Bidau Santa-Ana depois hasoru malu iha Largu Lesidere. Depoiz kari aifunan iha Nossa Senhora Lesidere ne’e kontinua kedas animasaun inklui atividade dada rifa.
“Ba dada rifa, ami prepara Prezidente ba manán-na’in hanesan motór, bisikleta, pasta ba estudante, laptop, handphone, jelera no iha sasán dapur nian,” Ângelo, katak.
Sekretáriu Jerál Komisaun hatutan, komemorasaun ne’e realiza de’it iha Dili no durante komemorasaun ne’e Amu Kardeál mak sei dirije orasaun no Prezidente Repúblika, José Ramos-Horta mak sei fó mensajen.
“Ita bele dehan ohin loron ikus ba preparasaun atividade sira nune’e ohin ekipa fahe konvite no prodús banner. Husi ne’e ita bele dehan preparasaun atinje 90%,” nia tenik.
Jornalista : Osória Marques
Editora : Julia Chatarina
