DMRHC lansa projetu melloramentu uma tradisionál iha Suai Loro
KOVALIMA, 28 Agostu 2025 ( TATOLI) – Diretór Jerál Dezenvolvimentu Rurál no Abitasaun Komunitáriu, Filipe Cardoso, hamutuk ho xefe Suku Suai-Loro, kinta-ne’e, lansa projetu melloramentu uma tradisionál, iha suku Suai Loro, Postu Aadministrativu Suai, Munisípiu Kovalima.
“Ohin, halo lansamentu konstrusaun melloramentu uma tradisionál ne’ebé tama iha klasifikasaun ba programa melloramentu uma tradisionál hamutuk uma-46 bazeia ba dadus levantamentu tékniku, Estudu peskiza hahú 2020-2024 presiza fó importánsia hodi prioritiza konstrui uma tradisionál”, Diretór Jerál ne’e hato’o ba jornalista sira, hafoin lansa konstrusaun uma tradisionál iha Suai-Loro ohin.
Bazeia ba rezultadu estudu, katak projetu melloramentu uma tradisionál 46 sai alvu liuliu iha suku Suai Loro espesiál iha aldeia Loro atu kontinua konserva fali nia orijen.
“Ita hotu hatene orsamentu ba programa konstrusaun uma melloramentu tradisionál prevee iha kapitál dezenvolvimentu ho nia implementasaun liuhusi konkursu públiku hodi halo selesaun ba empreza sira,” nia informa.
Iha Prosesu konkursu públiku ne’e hala’o iha Ministériu liuhusi prosesu ne’e empreza kontraktór mak Jeninjetdinana Ino UNIP, Lda no empreza JV Golden WAY Unip ho orsamentu $544,947.76.
Bazeia kontratu servisu empreza ho Governu define iha kontratu periodu ba melloramentu uma tradisionál durante tinan ida ne’ebé hahú implementa iha loron 1 Agostu 2025 sei remata iha loron 1 agostu 2026.
Iha biban hanesan, Xefe Suku Suai Loro, Manuel Gomes da Costa, agradese ba Governu tanba programa halo molloramentu uma tradisionál iha suku Suai Loro, munisipiu Kovalima parte importante atu konserva identidade timoroan nian.
“Ohin, hahú hala’o ona lansamentu atu halo konstrusaun iha suku Suai-Loro,” nia agradese.
Jornalista:Celestina Teles
Editór:Florencio Miranda Ximenes
