Kandidatu majistratura ida la admitidu hafoin konklui formasaun iha Portugál

DILI, 28 Agostu 2025 (TATOLI)-Kandidatu majistratura judisiál na’in-13 ne’ebé frekuenta formasaun da-hitu ba tinan-2023 iha Portugál durante tinan ida resin, ida mak la admitidu.
“Nia halo hela rekursu hodi buka solusaun kona ba desizaun sentru formasaun ne’ebé mak la admite nia iha prosesu ne’e. Ita seidauk hatene sentru formasaun jurídika Portugál ka ita-nia sentru, ne’ebé ita seidauk hatene”, Prezidente Tribunál Rekursu, Afonso Carmona, hatete ba jornalista sira iha Tribunál Judisiál Primeira Instánsia Dili Kaikoli, kinta ne’e.

Kandidatu sira ne’e fila mai Timor iha loron 30 fulan-Jullu liubá, liuhusi Konsellu Superiór Majistratura Judisiária iha kuarta, (27/8/2025) nomea ona na’in-12 ne’ebé admitidu ba juis estajiáriu tuir dekretu lei no sei destaka ba tribunál primeira instansia sira hodi hahú ajuda servisu. Antes ida-ne’e, simu uluk pose kuandu publika ona iha jornál repúblika.
“Ba kandidatu juis ida ne’ebé la admitidu, nia prosesu la’o hela, ita akompaña situasaun ida-ne’e, problema saida”, nia haktuir.
“Tuir lei presiza loron-10 hodi públika sira nia naran. Bainhira sira nia naran públika ona iha jornál repúblika mak ita halo planu hodi ba tomada pose”, nia informa.
Notísia relevante: Majistradu MP nain-lima ohin aranka hodi tuir formasaun iha Portugal
Jornalista : Natalino Costa
Editora : Rita Almeida

