Loke ona kuotasaun faze daruak ba projetu PNDS iha Suku Ahik
VIKEKE, 28 Agostu 2025 (TATOLI)—Xefe Suku Ahik, Postu Administrativu Lakluta, Munisipiu Vikeke, Ercilio Soares hateten projetu Programa Nasionál Dezenvolvimentu Suku (PNDS) ba tinan 2025 iha Suku Ahik seidauk implementadu no foin hahú loke kuotasaun ba empreza sira.
Nia haktuir programa PNDS ba tinan 2025 iha nivel Munisípiu Vikeke lansadu iha 12 Juñu tinan ne’e no iha fulan kotuk suku loke uluk ona kuotasaun ba empreza sira atu fornese materiál fabrikadu hanesan silindru no eskavatór durante semana rua, maibé laiha empreza ida mak sosa kuotasaun.
“Tanba ne’e, ohin ami hamutuk ho tékniku PNDS sira bá fali survey lokál implementasaun obra no hafoin survey ramata ami kontinua ba suku hodi loke kuotasaun daruak nian,” Ercilio Soares hateten ba TATOLI iha Postu Lakluta, Kinta ne’e.
Notísia relevante: Suku Ahik seidauk bele implementa projetu PNDS 2025 tanba estrada aat
Nia dehan, loke prosesu kuotasaun ba daruak mak empreza la mai konkorre, Suku Ahik labele implementa obra PNDS ba tinan 2025 no orsamentu sei filafali ba kofre Estadu.
Obra PNDS tinan 2025 atu halo reabilitasaun estrada ba komunidade husi Aldeia Ai-Look to’o Aldeia Kai-Wa iha Suku Ahik ho totál distánsia kilómetru 2 ne’ebé sei gasta orsamentu $25.945,13.
Tuir kalendáriu, implementasaun obra PNDS tenke finaliza iha 31 Dezembru 2025. Liu ida-ne’e orsamentu sei filafali ba kofre Estadu. Reabilitasaun estrada kilométru 2 ne’e sei benefísia populasaun 1.247.
Suku Ahik kompostu husi aldeia lima hanesan Krarek Boku, Hali-Oan, Ai-Look, Hali-Mean no Kai-Wa.
Jornalista: Vitorino Lopez da Costa
Editór: Xisto Freitas da Piedade
