DILI, 28 Agostu 2025 (TATOLI)—Timor-Leste aprezenta lian haat liuhusi Master of Ceremony (MC) iha abertura ofisial ba Dili International Trade Expo (DITE) 2025 ne’ebé partisipa husi nasaun sia hanesan Austrália, Brunei Darussalam, Kamboja, Xina-Makau, Fiji, Índia, Indonézia, Malázia no Singapura.
MC ne’ebé ko’alia lian haat iha serimónia abertura ne’e mak hanesan Hugo Freitas ne’ebé ko’alia lia-tetun ho indonézia, Deusalina lori lia-inlgés no Natalício Assunção mandarin ne’ebé marka diferensa dahuluk iha eventu internasionál ne’ebé realiza iha Timor-Leste.
Lia-indonézia, inglés no tetun sai hanesan dalen ne’ebé uza iha serimónia boot sira ne’ebé durante ne’e Governu realiza. Maibé, mandarin difísil uza iha eventu sira tanba susar, karik iha mós bainhira fonte sira husi Xina mak ko’alia hafoin mak tradutór halo tradusaun. Maibé agora timoroan sira hahú esforsu apreende lian oioin inklui mandarin, ne’ebé hatudu ona ba mundu katak Timor-Leste bele.
Durante serimónia MC sempre ko’alia uluk lian ofisiál Timor-Leste nian mak tetun tanba iha eventu ne’e hala’o iha Timor-Leste no povu presiza hatene eventu ne’e, hafoin halo tradusaun ba lian inglés ho objetivu tanba bainaka sira kuaze barak mak mai husi rai-li’ur. Tuirmai lian Indonézia tanba nasaun viziña Indonézia mós hola parte iha eventu ne’e, no ikus halo tradusaun ba mandarin, tanba bainaka barak mai husi Xina.
Iha eventu tradusaun ba lia-mandarin ne’e, partisipante hotu sente kontente no basa-liman, liuliu sira husi Xina, bainhira MC halo tradusaun ba sira-nian dalen.
Iha biban ne’e mós Primeiru-Ministru Xanana Gusmão ne’ebé partisipa no halo abertura ba DITE 2025 ne’e mós hatudu nia sentimentu kontente liuhusi basa-liman hamutuk ho partisipante sira seluk.
Hafoin halo abertura ba eventu DITE 2025, jornalista sira konversa ho MC Natalício Assunção ne’ebé lori mandarin, hateten sente orgullu tanba oituan ka barak liuhusi língua bele kontribui ba nasaun.
Nia dehan, sente orgullu bele ko’alia mandarin, maibé la’ós nia mesak de’it, iha kolega joven timoroan barak ne’ebé iha esperiénsia ho lingua sira seluk, hanesan españól, fransés, inglés no mandarin, maibé eventu ohin nia mak hetan oportunidade bele ko’alia.
“Ha’u hetan konvite direta husi Gabinte Ministériu Komérsiu no Indústria nian hodi lori lia-mandarin, tanba agora mandarin konsidera hanesan língua internasionál. Iha eventu ohin ne’e, iha mós partisipante barak liu husi Xina, entaun prezensa ha’u-nian iha ne’e ko’alia mandarin atu fasilita sira kompreende didi’ak ita-nia espozisaun ida-ne’e no futuru kontribui di’ak liután hodi dada sira mai investe iha ita-nia rai”, Natalicio Assunção hateten iha CCD.
Tuir nia, mandarin importante tebes tanba hanesan língua komérsiu nian ne’ebé iha mundu ema barak utiliza, la’ós inglés de’it.
“Ita espera liuhusi língua ne’ebé ita hatene hatudu ba mundu, liuliu liuhusi espozisaun ida-ne’e bele kontribui buat ruma ba nasaun, ein termu investimentu iha ita-nia rai-laran. Daudaun, ami joven nia kontribuisaun liuhusi língua bele atrai investidór sira”, nia dehan.
Nia haktuir mandarin difísil maibé nia hatene ko’alia tanba apreende hanesan husi kursu no nia mós antes ne’e hala’o nia estudu hasai lisensiatura no mestradu durante tinan ualu iha Xina.
Jornalista : Arminda Fonseca
Editora : Maria Auxiliadora
