DILI, 29 Agostu 2025 (TATOLI)—Xefe Departamentu Koordenasaun Jestaun Risku no Formasaun Edukasaun Sívika Diresaun Nasionál Seguransa Rodoviária iha Polísia Nasionál Timor-Leste (PNTL), Superintendente Asistente Polísia Domingos Sarmento Gama, sujere ba Governu atu instala kámara Electronic Traffic Law Enforcement (ETLE) iha pontu balun iha dalan hodi deteta utilizadór transporte viola Kódigu Estrada.
Superintendente Asistente Polísia Domingos hato’o kestaun ne’e, hafoin sai oradór iha semináriu ho tema ‘Safety Riding Goes to Campus’, ne’ebé organiza husi PNTL no empreza Shell, hodi sensibiliza Dekretu-Lei nú. 6/2003 03 Abríl kona-ba Kódigu Estrada, ba estudante universitáriu no eskola sekundária.
“Ohin ita-nia estudante preokupa kona-ba serbisu membru PNTL iha terrenu liuliu kona-ba tilang (apreensaun) sira-nia motór dala-rua, membru husu fali osan. Atu evita husu sobornu iha terrenu, dalan úniku ba Governu ne’e maka tenke estabelese ona eletrónika tilang ka bolu dehan ETLE,” Domingos Gama hato’o ba jornalista sira hafoin partisipa semináriu iha Institute of Bussiness (IOB), Fomentu, Sesta ne’e.
Notísia relevante : PNTL no empreza Shell sensibiliza Kódigu Estrada ba estudante universitáriu
Nia dehan, dalabarak nia sempre preokupa ho membru Polísia Tránzitu sira-nia serbisu tanba halo pasa revista no halo tilang ba transporte.
“Tanba ne’e presiza estabelese sistema elektrónika ETLE nune’e evita aktu sira hanesan ne’e,” nia akresenta.
Domingos Gama nota iha Indonézia introdús ona sistema hanesan kámera halo tilang ba ema nia motór ka karreta kuandu sira viola Kódigu Estrada.
“Kuandu sistema ne’e deteta atu sé de’it tenke ba selu obrigatóriamente iha banku laiha nego, entaun Dili ne’e tenke aplika ona. Kuandu ita implementa sistema ne’e, sistema ida manuál ita la uza ona, no ita bele evita buat ida Korrupsaun ativa ka subornu sira,” Domingos katak.
Nune’e, nia husu ba sidadaun sira, karik hetan membru Polísia balun ne’ebé halo serbisu la profisionál, halo tilang ba transporte sira mak husu fali osan ba motorista sira ne’e krime no bele hato’o ba Komandu Jerál PNTL hodi halo prosesu.
“Se sira rasik sente vítima duni ba krime korrupasaun ne’e sira tenke keixa hasoru suspeitu sira ne’ebé koko uza nia poder hodi husu buat ruma ba sidadaun sira,” Superintendente Asistente Polísia hato’o.
Biban ne’e, nia husu ba membru Polísia sira atu hatudu serbisu profisionál.
“Tau a’as integridade instituisaun PNTL tuir saida mak luta-na’in sira-nia hakarak serví povu no nasaun,” nia fó hanoin ba membru Polísia.
Jornalista : Natalino Costa
Editora : Julia Chatarina
