DILI, 29 Agostu 2025 (TATOLI)—Polísia Nasionál Timor-Leste (PNTL) liuhusi Departamentu Koordenasaun Jestaun Risku no Formasaun Edukasaun Sívika Diresaun Nasionál Seguransa Rodoviária hamutuk ho empreza Shell, Kinta ne’e, organiza semináriu ida ho tema ‘Safety Riding Goes to Campus’ ba estudante sira.
Inisiativa ne’e hodi sensibiliza Dekretu-Lei nú. 6/2003 03 Abríl kona-ba Kódigu Estrada ba estudante universitáriu no sekundária sira tanba nota katak estudante barak ladún respeita Kódigu Estrada.
“Seminár ne’e fokus liu ba estudante sira iha universidade no eskola sekundária hodi labele viola Kódigu Estrada. Tanba violasaun lei númeru 6/2003 ne’e barak tebes halo husi ita-nia territóriu mak estudante sira. Kadavez sira hatene, maibé sira koko atu viola lei ne’e,” Xefe Departamentu Koordenasaun Jestaun Risku no Formasaun Edukasaun Sivika Diresaun Nasionál Seguransa Rodoviária PNTL, Superintendente Asistente Polísia Domingos Sarmento Gama, hato’o ba jornalista sira, hafoin partisipa semináriu iha salaun Institute of Bussiness (IOB), Fomentu.
Superintendente Asistente Domingos nota katak, iha Universidade Nasionál Timor-Lorosa’e (UNTL) iha ona zebra cross, maibé dalabarak estudante sira la uza hodi ultra pasa.
“Sira dalabarak viola ida-ne’e, zebra cross iha tiha mak liuhusi ne’ebá ne’e sira viola Kódigu Estrada,” nia akresenta.
Nia dehan, husi Kódigu Estrada artigu 93 ba utilizasaun zebra cross ne’e, kuandu ema atu hakat husi estrada sorin ba estrada sorin tenke liuhusi zebra cross, kuandu lae sei aplika multa hahú $1 to’o $6.
“Maibé ida-ne’e to’o agora lei Kódigu Estrada entra vigór ona tinan 23 maibé seidauk implementa di’ak. Tuir loloos sé mak la kumpre ida-ne’e iha sansaun no iha mós multa. Tanba ne’e husi semináriu ida-ne’e ninian foku ba estudante sira atu konsensializa sira kumpre ba Kódigu Estrada,” nia katak.
Notísia relevante : Atu minimiza asidente tráfiku, presiza hasa’e montante multa kódigu estrada
Superintendente Asistente konsidera semináru ne’e importante tebes hodi bele esplika artigu sira husi Kódigu Estrada. Semináriu ida-ne’e la’ós ba de’it estudante husi universidade de’it, maibé PNTL kolabora ho empreza Shell hodi kontinua ba eskola sekundária sira, nune’e konsensializa sira bele komprimenta ba lei Kódigu Estrada.
PNTL rejista númeru asidente rejista maka’as ne’e envolve joven ho idade produtivu hanesan idade 25 mai kraik tanba la kumpre ba Kódigu Estrada.
“Husu hotu-hotu atu kumpre ba lei Kódigu Estrada hodi ita bele prevene asidente viasaun tanba kazu asidente barak ne’e iha ita-nia territóriu tuir dadus ne’ebé ami rejista ne’e envolve joven husi idade produtivu 25 mai kraik,” nia katak.
Iha fatin hanesan, Vise-Reitór I ne’ebé trata ba asuntu Akadémiku iha IOB, Facio Sarmento Soares, sente haksolok tanba bele realiza atividade ne’e.
“Seminár ida-ne’e di’ak tebes tanba bele eduka estudante sira hatene kona-ba regra tránzitu no oinsá atu konsensializa sira hodi bele prevene asidente sira,” nia hato’o.
Nune’e mós, Reprezenta empreza Shell, José Xavier, hateten, ba oin empreza ne’e kontinua apoia PNTL hodi halo sosializasaun ba estudante sira iha nível ensinu superiór no sekundária nune’e sira bele kumpre regra tránzitu.
Jornalista : Natalino Costa
Editora : Julia Chatarina
