Atu minimiza asidente tráfiku, presiza hasa’e montante multa kódigu estrada
DILI, 11 Agostu 2025 (TATOLI)—Ministru Transporte Komunikasaun (MTK), Miguel Marques Gonçalves Manetelu, hateten atu minimiza asidente tráfiku ne’e presiza muda lei kódigu estrada nú. 6/2003 espesialmente artigu nú.1200 no hasa’e montante multa kódigu estrada ba ema-ne’ebe kontra sinál tránzitu.
Notísia Relevante: PNTL halo apreensaun ba motorizada 78 tanba viola lei kódigu estrada
Nia hatutan, atu minimiza asidente tráfiku ne’e mak ministériu relevante sei instala CCTV’iha kruzamentu sira iha Dili laran, nune’e motorista sira-ne’ebé la uza sintu seguransa mós multa tanba ne’e la’ós buat foun.
“Tanba ne’e mak iha MTK, ha’u dehan, multa ba kontra sinál tránzitu ne’e fó montante boot duni. Hanesan sidadaun lauza kapasete ka lori karreta laiha karta kondusaun (SIM) fó multa ne’e $500 kedas, nune’e sira bele tauk,” Ministru ne’e informa ba jornalista sira iha salaun konferénsia Sentru Turizmu, Lecidere, foin lalais ne’e.
Governu, nia dehan, laiha intensaun atu foti osan husi nia sidadaun sira maibé lei kuandu halo ne’e tanba ema laiha dixiplina.
Nia dehan, sé mak la kumpre lei tenke multa tanba bainhira la uza kapasete mak hetan dezastre monu mate kedas ne’e folin boot liu multa, ne’ebé tenke prevene antes.
“Ha’u sei hateten katak muda lei ida multa ne’e tenke karun. Ne’e ha’u hateten kedas, ba oin, sei iha opsaun rua de’it ba sidadaun ne’ebé kontra regra sinál tránzitu. Hanesan, bainhira nia ba halo inspesaun karreta sei selu multa,” nia esplika.
Jornalista : Alexandra da Costa
Editór : Cancio Ximenes
