DILI, 29 Agostu 2025 (TATOLI)—Traballadór timoroan na’in-35 ho Governu liuhusi Sekretária Estadu Formasaun Profisionál no Empregu (SEFOPE), sesta ne’e, asina deklarasaun, antes sira dezloka ba Korea Súl iha 01 fulan-Stembru, hodi hala’o servisu iha área fábrika, peskas no indústria.
“Ha’u husu ba traballadór sira atu hatudu komportamentu ne’ebé di’ak, atu nune’e Governu Korea fó nafatin konfiansa no oportunidade ba timoroan sira seluk. Se sira serbisu hela, sira labele baruk-teen hanesan iha Timor, maibé diáspora ida-ne’e hatudu hela mai ita sira-nia hahalok ne’ebé badinas liu, tanba iha Korea sira serbisu tuir oras,” Diretora Jerál Interina Sekretária Estadu Formasaun Profisionál no Empregu (SEFOPE), Clementina Araújo de Almeida, hateten ba jornalista iha salaun Timor Lodge, Komoro, ohin.
Aleinde ne’e, nia informa, funsionáriu foun na’in-26 no eis-funsionáriu na’in-neen (6) hetan kontratasaun foun husi sira-nia empreza iha Korea
“Ami-nia traballadór na’in 33 sei serbisu iha indústria peska nian, ida iha fábrika sira, no ida iha indústria,” nia hatete.
Reprezentante traballadór timoroan, Adriano Xavier, hato’o agradesemtnu ba Governu Konstitusionál da-sia (IX) nia esforsu no realiza servisu hamutuk ho Governu Korea Súl hodi fó empregu ba joven sira iha Timor-Leste.
“Bainhira ha’u ba serbisu iha Korea, ha’u hakarak hadi’a ha’u-nia família nia finansa no mós haruka ha’u-nia alin sira ba eskola iha área ne’ebé sira hadomi,” nia dehan.
Jornalista : Alexandra da Costa
Editór : Cancio Ximenes
