DILI, 01 Setembru 2025 (TATOLI)—Governu Brazíl liuhusi Embaixadór Brazíl iha Timor-Leste, Ricardo José Lustosa Leal, hasoru malu ho ho Primeiru Ministru Kay Rala Xanana Gusmão hodi diskute kona-ba asuntu bilaterál no multilaterál hanesan simeira líder nian molok realiza Conferênçia das Partes (COP) ba da-30 iha Belém.
“Ami diskute kle’an-liu kona-ba asuntu bilaterál no multilaterál sira seluk hanesan simeira líder sira-nian molok Conferênçia das Partes (COP) ba da-30 Partidu sira-nian, ne’ebé sei hala’o iha Belém iha fulan-novembru ne’e,” Embaixador Brazíl ba Timor-Leste, Ricardo José Lustosa Leal, informa ba jornalista sira iha Palasiu Governu, ohin.
Tamba ne’e, nia iha onra atu enkamiña ba Prezidente Repúblika Demokratiku Timor-Leste husi Prezidente Lula nia konvite ba lideransa timoroan atu partisipa iha COP ba da-30 iha Belém.
“Iha enkontu ne’e ami mós temi kona-ba Timor-Leste nia entrada mai ASEAN, ezijénsia integrasaun ne’ebé asosiadu ho Timor-Leste nia inkluzaun nu’udar membru plenu ASEAN nian, agrupamentu rejionál ne’ebé Brazíl fó valór boot,” nia dehan.
ASEAN agora daudaun hanesan parseiru komersiál boot datoluk Brazíl nian, hafoin Xina no Estadu Unidu.
Nia hatutan, kona-ba vizaun Timor-Leste nian iha ámbitu ASEAN nian, Brazil mós kolabora ho Timor-Leste kona-ba kapasitasaun, kona-ba inisiativa lubuk ida, hodi hanoin hikas modelu kolaborasaun bazeia ba saida mak rekonfigura polítikamente.
“Agora iha rekonfigurasaun ida, kursu ida, Timor-Leste nia entrada ba ASEAN. Prova ida-ne’e no mós importánsia ne’ebé agrupamentu rejionál hetan ona ba Brazíl,” nia dehan.
Nune’e iha rekonfigurasaun ida-ne’e sira iha hanoin fila-fali oinsá sira sei kontinua kolabora, tanba sira iha enkuadramentu ida-ne’ebé klaru tebes, amigavél entre, kooperasaun dezenvolvimentu entre Brazíl no Timor-Leste hala’o.
“Brazíl halo operasaun iha área oioin; agora daudaun ami esplora hela oportunidade sira ba kolaborasaun iha área ensinu tékniku profisionál no divulgasaun lian portugés,” nia dehan.
Nia énfaze, iha baze sólidu tebes tanba Primeiru-Ministru mos afirma klaru tebes kona-ba ida-ne’e, sólidu tebes no substantivu no baze konsistente ona, iha ne’ebé Brazíl no Timor-Leste servisu hamutuk ba dezenvolvimentu.
Jornalista : Alexandra da Costa
Editór : Cancio Ximenes
