VIKEKE, 01 Setembru 2025 (TATOLI)—Organizasaun Naun Govermentál, Fundasaun Komunidade Haberan Komunidade (KHK) munisípiu Vikeke, durante ne’e organiza komunidade sira establese grupu hamutuk 347 hodi implemente atividade oi-oin inklui atividade agrikultura.
“Ami akompaña grupu sira-ne’e ninia progresu di’ak tanba husi grupu 347 maioria implementa atividade agrikultura hanesan kuda modo, halo natar no rai osan. Rezultadu husi atividade agrikultura sira-ne’e ita-nia komunidade sira uza ba sira-nia nesesidade loron-loron”, Koodernador F-KHK, Agusto Pinto hateten ba TATOLI, iha postu Vikeke Villa, ohin.
Grupu hirak ne’e, F-KHK kontinua apoia no fasilita formasaun kona-ba agrikultura, formasaun jestaun, material kanalizasaun bee-moos no apoia materiál agrikultura hanesan ensxada, kanuru suru rai, hand tratór, makína sama hare, dulas nu’u, inklui fini modo musan sira ba grupu sira atu kuda.
“Ami servisu hamutuk Care Internasionál, CRS, Caritas Austriália no Gabinete apoia sosiadade sivil atu fasilita formasaun no apoia materiál ba ita-nia grupu sira hodi implementa atividade iha baze”, nia hato’o.
Grupu 347 ne’e, F-KHK transforma sai Uniaun Agrikultura iha munisípiu Vikeke hodi garante nia sustentablidade, nune’e mós iha grupu 13 mak transforma ba Koopertiva iha Postu Vikeke Villa no foin lalais Sekretária Estadu Cooperativa fasilita tán formasaun báziku ba grupu Hakbi’it Famíla iha Uatulari ne’ebé transforma ona ba Cooperativa Multi Setorál Habi’it Família (C-MHF) iha postu Uatulari.
“Ba oin, ami kontinua apoiu ba ita-nia grupu sira hodi kontinua implementa atividade liuliu agrikultura nian, atu ita bele hasa’e produsaun lokál hodi sustenta komunidade sira,” nia promete. Nia hato’o.
Notisia relevante: Fundasaun KHK halo advokasia kona-ba sistema saúde emerjénsia iha Uatulari
Jornalista : Vitorino Lopes da Costa
Editór : Florencio Miranda Ximenes
