DILI, 01 Setembru 2025 (TATOLI)—Departamentu Saúde Polísia Nasionál Timor-Leste (PNTL) hamutuk ho Departamentu Saúde servisu hamutuk ho Diresaun Nasionál Prevensaun Kontrola Moras Hadaet no Laboratoriu Nasionál husi Ministériu Saúde (MS), Segunda ne’e, halo teste saúde ba membru Polísia.
Xefe Departamentu Saúde PNTL Superintendente Assistenste Polísia, Analita do Rego Fatima hateten, liuhusi kooperasaun ne’e konsege halo ona teste laboratoriál ba membru Komandu PNTL Munisípiu Bobonaru, Kovalima, Rejiaun Administrativu Espesiál Oekusi Ambenu (RAEOA), Dili, no ikus liu ba membru ne’ebé destaka iha Komandu Jerál.
“Ami-nia atividade ohin ne’e halo teste ba membru PNTL hotu, atividade ne’e ita la’ós foin mak halo, ohin ita kontinua halo serbisu hamutuk ho Ministeriu Saúde, liuhusi Diresaun programa moras hadaet hanesan HIV-Sida, cipilis, atu halo teste ba membru Polísia sira-nia saúde, liuliu atu hatene karik ita-nia membru balun sofre moras hadaet ga lae,” Xefe Departamentu Saúde informa ba Jornalista sira, iha Komandu Jerál PNTL, Kaikoli.
Notísia relevante : HNGV klarifika Laboratóriu Nasionál teste raan la’o hela
Nia dehan, MS iha trajetu halo teste ba ema na’in-600.
“Agora ita alkansa ona númeru 300 tanba ba Munisípiu tolu ne’e kompostu husi membru na’in-100, entaun ita iha ona ema na’in-300. Husi laboratóriu nasionál atu aumenta tan ema na’in-100 no ohin iha ne’e (Kuartel Jerál) hamutuk iha ona ema na’in-50 mak halo ona teste. Sira-nia espera sei atinje númeru ne’ebé husi Laboratóriu Nasionál husu,” nia katak.
Iha fatin hanesan, Ofisiál HIV Testing Service, Simão Lopes Pereira hatutan, PNTL koopera ho Ministeriu Saúde ho objetivu atu halo teste membru Polísia sira-nia amostra raan.
“Se iha pozitivu ruma, ita sei koopera no halo koordenasaun ba parte PNTL nian, liuliu sira ne’ebé iha área saúde para oinsá bele koordena ho ema sira ne’ebé mak ita identifika, nune’e ba futuru ne’e atu iha kontinuasaun ba tratamentu moras tolu ne’e,” nia tenik.
Jornalista : Natalino Costa
Editora : Julia Chatarina
