Sosiedade Sivíl husu empreza Uca-Aba aselera projetu eletrifikasaun ba suku Uma-Ki’ik
VIKEKE, 01 Setembru 2025 (TATOLI)—Diretór Ezekutivu Fundasaun Knua Haberan Komunidade (F-KHK), Agusto Pinto, husu ba empreza Uca-Aba, UNIP,Lda aselera projetu eletrifikasaun ba komunidade suku Uma Ki’ik, Postu Vikeke Villa.
“Daudaun, ita-nia komunidade sira preokupa ba projetu eletrifikasaun ba suku Uma Ki’ik nian, besik fulan-haat ona empreza abandona hela sira-nia servisu. Tanba agora tempu bailoron ona, maibé servisu la la’o. Tan ne’e, mak ita-nia komunidade fó hatene ami sosidade sivíl atu ajuda sira koalia sai”, Agusto Pinto, hateten ba TATOLI, iha postu Vikeke Villa, ohin.
Durante implementa obra eletrifikasaun ne’e, Diretór dehan komunidade iha suku referidu fó sira-nia kontribuisaun maka’as hanesan plantasaun sira gratuita, ho objetivu atu asesu naroman husik eletrisidade, maibé to’o agora empreza la kontinua ona nia servisu ka daudaun obra paradu hela.
“Tuir loloos tempu agora ne’e aproveita servisu, kuandu udan fali distribuisaun material ba fatin implementasaun hetan difikuldade tanba kestaun kondisaun estrada. Nune’e ha’u mós halo komfirmasaun ba autoridade suku Uma Ki’ik katak empreze sei implementa iha fulan-Setembru ne’e”, nia haktuir.
Nune’e, nia relata durasaun ba obra eletrifikasaun ba suku Uma Ki’ik ne’e fulan-tolu, maibé to’o agora seidauk konklui tanba ne’e empreza presiza aselera.
“Sasán eletrifikasaun nian dehan tuir dalan, maibé to’o agora seidauk to’o hela de’it iha suku Uma Ki’ik. Ne’ebé ami husu se bele aselera obra ne’e, atu to’o iha fulan Dezembru ita-nia komunidade sira bele asesu ba naroman”, nia sujere.
Empreza sosa fiu iha Surabaya
Iha fatin ketak, Xefe Suku Uma Ki’ik, Claudio Amaral, haktuir autoridade suku Uma Ki’ik kontinua komunika ba empreza implementadór hodi kontinua obra referidu, ne’ebé ba komunidade sira nafatin pasiénsia hodi hein prosesu tanba sasán eletrifikasaun mai husi rai liur.
“Ami rona empreza sei ba sosa materia iha Surabaya. Nune’e ha’u nafatin halo koordenasaun ho empreza, maibé daudaun ne’e Diretór empreza implementadór sei iha Surabaya, nasaun hodi sosa material. Ha’u husu komunidade sira nafatin ho pasiénsia. Tanba Ai-rin eletrifikasaun hamri’ik hotu ona hein de’it fiu no sasán sira seluk”, nia enkoraja.
Uma-kain 193 husi aldeia haat hanesan Raihun, Macadean, Maroman no Ainauain iha suku Uma Ki’ik mak sei benefisia ba projetu ne’e.
Projetu referida ho númeru kontratu 004/wk/EDTL,E.P 2025, ho kustu $247.903,60, ne’ebé responsabiliza husi empreza Uca-Aba unip, LDA.
Jornalista : Vitorino Lopes da Costa
Editór : Florencio Miranda Ximenes
