DILI, 02 Setembru 2025 (TATOLI)—Empreza Distribuitór Starking koopera ho Autoridade Inspesaun Fiskalizasaun Atividade Ekonómia Sanitária no Alimentár (AIFAESA) rekolla bee ho marka “AQUASE” ne’ebé kontaminadu ho baktéria, maibé ida-ne’ebé laiha kontaminasaun baktéria sira kontinua faan.
Notísia Relevante: Rezultadu teste kualidade amostra “AQUASE” kontamina ho baktéria 33,3%
Diretor Ezekutivu Starking, Lay Siu Hing hateten sira simu ona karta husi AIFAESA kona-ba rezultadu teste nian, durante ne’e sira koopera ho AIFAESA ne’e mak sira mós muda sai tiha bee ne’ebé kontaminadu ba armajen AIFAESA nian.
“Ami koopera malu tanba ne’e mak AIFAESA mai foti ami-nia sampel, maibé impaktu husi kontaminadu ne’e dalaruma akontese kedas iha fabrika fatin. Se lae, iha dalan bainhira halo prosesu importasaun no mós bele akontese mós tanba iha Timor rai manas,” Diretór Ezekutivu ne’e informa ba Agência Tatoli liuhusi telefónika, ohin.
Tamba ne’e, jestór ne’e dehan, bee ne’ebé kontamina ho baktéria sira sei la faan maibé bee sira seluk ne’ebé la kontamina ka la priexe tuir kategória ne’ebé iha sei kontinua halo distribuisaun nafatin, tanba bee ne’ebe tama iha pakote kontaminadu antes ne’e AIFAESA mós halo ona rekollamentu hodi ba tau iha sira-nia armajen.
“Nune’e mekanizmu ne’ebé iha maka tenke hatama mós ninia teste laboratóriu durante fulan tolu, se lae fulan neen para ekipa AIFAESA bele haree,” nia esplika.
Enkuantu rezultadu husi teste laboratóriu ba bee ho marka “AQUASE” hetan kontaminadu baktéria 33.3% mak hanesan 730,740, 83C no 84C.
Totál amostra sira-ne’e halibur husi distributór prinsipál haat no loja neen (kioske no supermerkadu sira) ne’ebé serve hanesan fatin fa’an no armazenamentu.
Totál kaixa bee Aquase hamutuk 11.391 mak hetan kontaminadu kompostu husi kaixa 805 husi tipu 1,500 ml no 10.586 husi tipu 600 ml.
Totál bee ho marka AQUASE husi empreza Starking ne’ebe ekipa AIFAESA rekolla hamutuk 7,198 ne’e kompostu husi 600 ml ne’e hamutuk 6412 no 1500 ml me’e hamutuk 786.
Jornalista : Alexandra da Costa
Editór : Cancio Ximenes
