DILI, 01 Setembru 2025 (TATOLI)-Komisaun B iha Parlamentu Nasionál ba trata asuntu Negósiu Estranjeiru, Defeza no Seguransa, solisita ba Polísia Nasionál Timor-Leste (PNTL), liuhusi Unidade Tránzitu atu reforsa sensibilizasaun sobre Kódigu Estrada ba utilizadór sira hodi redús asidente tráfegu iha territóriu.
Deputadu Komisaun B, Natalino dos Santos, preokupa tanba asidente tráfegu kontinua akontese, tanba falta konxiénsia ema nian bainhira kondús veíkulu la ho kuidadu. Nune’e, nia apela ba utente sira halai velosidade natoon tanba vida ne’e la sosa.
Nia husu ba Unidade Tránzitu atu aplika regra ho rigoroza tuir orden, nune’e utilizadór bainhira kondús viatura tenke uza kapasete, iha karta kondisaun no seluk tan.
“Presiza halo sensibilizasaun másima ba Kódiku Estrada iha eskola to’o universidade, no suku sira hodi hasa’e koñesimentu ema nian oinsá prevene [asidente]”, nia hato’o.
Deputadu Natalino ezije mós ba Ministériu Transporte no Komunikasaun (MTK), liuhusi Diresaun Nasionál Transporte Terrestre (DNTT) atu tau atensaun ba semáforu iha área Kolmera nian ne’ebé la funsiona kuaze fulan haat ona.
Deputadu FRETILIN, Antoninho Doutel Samento, mós husu atu toma antensaun ba sinál tránzitu iha kapitál, tanba zebra cross barak iha estrada públiku ninia marka laiha ona.
Aleinde ne’e, presiza aumenta semáforu iha área Elemloi-Komoro no parte kruzamentu Audian.
Relembra katak, iha 05 Juñu, Diretór Departamentu Tránzitu no Seguransa Rodoviária Nasionál, Superitendente Asistente Polísia Luís da Costa, fó sai dadus iha fulan-Maiu tinan ne’e rejista asidente tráfegu iha territóriu hamutuk 203, kompostu husi ema lakon vida na’in-lima, kanek todan 29 no kaman 169.
Notísirelevante: https://tatoli.tl/2025/06/05/pntl-rejista-kazu-asidente-trafegu-iha-fulan-maiu-hamutuk-203/
Jornalista: Nelson de Sousa
Editora: Maria Auxiliadora
